Shakur Khan : ‘ऑपरेशन सिंदूर’ अंतर्गत सुरक्षा संस्थांनी देशात शोध मोहीम तीव्र केली आहे. अशातच राजस्थानमधील जैसलमेरमध्ये शकूर खान नावाचा एक गुप्तहेर पकडला गेला. तो राजस्थानमधील एका सरकारी विभागात कर्मचारी असल्याचे म्हटले जात आहे. शकूरवर पाकिस्तानची गुप्तचर संस्था इंटर-सर्व्हिसेस इंटेलिजेंस (ISI) ला गोपनीय माहिती दिल्याचा आरोप आहे. धक्कादायक बाब म्हणजे तो माजी कॅबिनेट मंत्री सालेह मोहम्मद यांचा वैयक्तिक सहाय्यक देखील राहिला आहे.
JDU (जनता दल ‘युनायटेड’) नेते केसी त्यागी यांनी या प्रकरणाला दुर्दैवी म्हटले आहे. ते म्हणाले, ‘कॅबिनेट मंत्र्याचा एक सहाय्यक ISI ला माहिती देत होता, हे खूप लज्जास्पद आहे. अशा लोकांवर कठोर कारवाई झाली पाहिजे.’ या प्रकरणावर केंद्रीय मंत्री गजेंद्र सिंह शेखावत म्हणाले, ‘ही निश्चितच चिंतेची बाब आहे. या प्रकरणाची योग्य चौकशी झाली पाहिजे. यामध्ये सहभागी असलेल्या सर्व आरोपींना राष्ट्रीय सुरक्षेशी खेळल्याबद्दल योग्य शिक्षा झाली पाहिजे.’
‘ऑपरेशन सिंदूर’ अंतर्गत भारताच्या गुप्तचर संस्था देशात राहून आयएसआयसाठी हेरगिरी करणाऱ्यांवर लक्ष ठेवून आहेत. या मोहिमेअंतर्गत शकूर खानला २८ मे २०२५ रोजी अटक करण्यात आली. तो जैसलमेरच्या रोजगार विभागात तैनात होता. सूत्रांचे म्हणणे आहे की, शकूर अनेक वर्षांपासून आयएसआयच्या संपर्कात होता आणि भारताची महत्त्वाची माहिती शेअर करत होता. त्याचे फोन आणि बँक खात्यांची आता चौकशी सुरू आहे. त्याला चौकशीसाठी जयपूरला नेण्यात आले आहे.
ही पहिली घटना नव्हे, मे २०२५ मध्ये आयएसआयसाठी हेरगिरी केल्याच्या आरोपाखाली पठाण खान नावाच्या व्यक्तीला जैसलमेरमधूनच अटक करण्यात आली होती. एडीजी इंटेलिजेंस संजय अग्रवाल यांच्या मते, पठाण खान भारत-पाक सीमेची संवेदनशील माहिती आयएसआयला पाठवत असे. याशिवाय, हरियाणाच्या युट्यूबर ज्योती मल्होत्रालाही ऑपरेशन सिंदूर अंतर्गत अटक करण्यात आली. अलीकडेच गुजरातमधील कच्छ येथून सहदेव सिंग गोहिलला अटक करण्यात आली, जो बीएसएफ आणि नौदलाचे फोटो आणि व्हिडिओ आयएसआयला पाठवत होता.
सुरक्षा यंत्रणांची कारवाई तीव्र
सुरक्षा यंत्रणा आता शकूरच्या आयएसआय कनेक्शनची पूर्णपणे चौकशी करत आहेत. यासोबतच, ते देशातील इतर संशयितांवरही लक्ष ठेवून आहेत. ज्या अंतर्गत देशभरात हेरांना अटक केली जात आहे.
कोण आहे सालेह मोहम्मद ?
सालेह मोहम्मद हे भारतीय राष्ट्रीय काँग्रेसचे नेते आहेत. जे पूर्वी अल्पसंख्याक व्यवहारात कॅबिनेट मंत्री होते. ते पोखरण विधानसभा मतदारसंघातून राजस्थान विधानसभेचे सदस्य होते.
