जळगाव : गेल्या काही दिवसांपासून जळगाव जिल्ह्यात हत्येच्या घटना सातत्याने घडत असून, आता पुन्हा अशीच एका समोर आली आहे. अनैतिक संबंध असल्याच्या संशयातून पतीने धारधार शास्त्राने वार करून पत्नीची हत्या केली. शीतल उर्फ आरती सोमनाथ सोनवणे असे हत्या झालेल्या विवाहितेचे नाव असून, या घटनेमुळे परिसरात एकच खळबळ उडाली आहे.
मिळालेल्या माहितीनुसार, धरणगाव तालुक्यातील हनुमंतखेडा येथे ही घटना घडली आहे. पती सोमनाथ उर्फ सोन्या अशोक सोनवणे हा पत्नी शीतल उर्फ आरती हिच्या चारित्र्यावर नेहमी संशय घेऊन नेहमी मारहाण करत असे.
दरम्यान, गुरुवारी पहाटे पावणे तीन वाजेच्या सुमारास त्याने पत्नी शीतल उर्फ आरती हिच्यावर कुऱ्हाडीने वार केल्याने तिचा जागीच मृत्यू झाला. या वेळी त्याने दहा वर्षाचा मुलगा सिद्धू याच्यावरही वार केले. यात तोदेखील गंभीर जखमी झाला असून, त्याच्यावर उपचार सुरु आहेत.
या प्रकरणी मयत शीतल हिचा भाऊ भाऊसाहेब भावलाल पवार यांनी दिलेल्या फिर्यादीनुसार, सोमनाथ उर्फ सोन्या अशोक सोनवणे याच्याविरोधात पोलिसात गुन्हा दाखल करण्यात आला आहे.
