जळगाव: भाजीपाला विक्रेता त्याच्या लावलेल्या हात गाडीवर पैशांचा हिशेब करत होता. याच दरम्यान अचानक खांबावरील विजेची तार कोसळली आणि यात त्याचा दुर्दैवी मृत्यू झाला. पारोळा शहरातील बूधनाथ मठा जवळील महाराष्ट्र रेस्टॉरंटजवळ शनिवारी संध्याकाळी ७.३० ते ८ वाजेच्या सुमारास ही घटना घडली. परमेश्वर संतोष महाजन (४२ रा . पेंढारपुर पारोळा) असे मयत भाजीपाला विक्रेत्याचे नाव आहे.
परमेश्वर महाजन हे शनिवारी नेहमी माणे पारोळा शहरातील बाजारपेठेतील हाकेच्या अंतरावर हातगाडीवर भाजीपाल्याचे दुकान लावत असतात. शनिवारी रिमझिम पाऊस सुरु होता. संध्याकाळी भाजीपाला विकून पैशांचा हिशोब लावत असतानाच अचानक याठिकाणी असलेल्या खांबावरील विजेची तार तुटून परमेश्वर महाजन यांच्या अंगावर कोसळली.
याठिकाणी प्रत्यक्ष उपस्थित असलेल्या नागरिकांनी तात्काळ घटनास्थळी धाव काठीच्या सहाय्याने परमेश्वर यांच्या अंगावर पडलेली विद्युत तार बाजुला केली आणि त्यांना तातडीने खाजगी रुग्णालयात हलवले. यावेळी या ठिकाणच्या नागरिकांनी घटनेची माहिती महावितरण कार्यालयाला दिली आणि वीज पुरवठा खंडित करण्यात आला. परमेश्वर यांना खाजगी रुग्णालयातून पारोळा शहरातील कुटीर रुग्णालयात दाखल करण्यात आले.
या ठिकाणी वैद्यकीय अधिकाऱ्यांनी परमेश्वरांना मृत घोषित केले. पारोळा शहरातील मुख्य बाजारपेठ असल्याने या ठिकाणी सायंकाळी नागरिकांचे गर्दी होत असते. मात्र, रिमझिम सुरू असलेल्या पावसामुळे गर्दी कमी होती. जर गर्दी असती तर कदाचित मोठी दुर्घटना घडली असती. भाजीपाला विक्रेत्याच्या मृत्यूच्या या दुर्दैवी घटनेने सर्वत्र हळहळ व्यक्त होत आहे.
