---Advertisement---
पाचोरा (प्रतिनिधी) : येथील रोटरी क्लब व जैन पाठशाळा यांच्या संयुक्त विद्यमाने रविवारी ( 29 जून) रोजी जामनेर रोडवरील जैन पाठशाळा सभागृह येथे सकाळी 10 वाजता “सायबर क्राईम” या विषयावर जाणीव जागृतीपर व्याख्यानाचे आयोजन करण्यात आले आहे. पुणे येथील सुप्रसिद्ध व राष्ट्रीय पुरस्कार विजेते सायबर सेक्युरिटी व्याख्याते डॉ. धनंजय देशपांडे हे सायबर सेक्युरिटीच्या संदर्भातील महत्त्वाचे नियम, कायदे आणि मंत्र यावेळेस सांगणार आहेत.
समाजात सायबर क्राईमचे वाढते प्रमाण आणि जनतेची फसवणूक या संदर्भातील जाणीव जागृती करण्यासाठी डॉ. धनंजय देशपांडे हे देशभर जागर करीत आहेत. या पार्श्वभूमीवर येथील रोटरी क्लब चे अध्यक्ष डॉ. पवनसिंग पाटील, सेक्रेटरी डॉ. शिवाजी शिंदे आणि जैन पाठशाळेचे नवनिर्वाचित अध्यक्ष प्रफुल्ल संघवी यांनी हे जनजागृती पर व्याख्यान आयोजित केले आहे.
पाचोरा पोलीस ठाण्याचे पोलीस निरीक्षक अशोक पवार त्यांचे सहकार्य लाभले आहे. पाचोरा शहर व तालुक्यातील व्यापारी, उद्योजक, युवक, युवती, तसेच बँकिंग क्षेत्राशी संबंधित कर्मचारी आणि ग्राहकांनी या व्याख्यानाचा लाभ घ्यावा, असे आवाहन आयोजकांनी केले आहे. व्याख्यानानंतर श्रोत्यांच्या शंका व प्रश्नांचे समाधान डॉक्टर धनंजय देशपांडे करणार आहेत. सदर व्याख्यान निशुल्क असून प्रवेश सर्वांसाठी खुला आहे. जास्तीत जास्त श्रोत्यांनी व्याख्यानाचा लाभ घेण्याचे आवाहन करण्यात आले आहे.
