---Advertisement---
Liam Dawson : भारत आणि इंग्लंड यांच्यात खेळल्या जाणाऱ्या अँडरसन-तेंडुलकर ट्रॉफीमध्ये आतापर्यंत तीन सामने खेळले गेले आहेत. नुकत्याच झालेल्या लॉर्ड्स कसोटीत इंग्लंडने २२ धावांनी विजय मिळवला. आता मालिकेचा पुढील सामना २३ जुलैपासून खेळवला जाणार आहे. मात्र, या सामन्यापूर्वी एका स्टार खेळाडूला दुखापतीमुळे मालिकेतून बाहेर व्हावे लागले असून, त्याची जागा ८ वर्षांपूर्वी शेवटचा कसोटी खेळलेल्या एका खेळाडूने घेतली आहे.
इंग्लंड क्रिकेट बोर्डाने अँडरसन-तेंडुलकर ट्रॉफीच्या चौथ्या कसोटीसाठी दुखापतग्रस्त ऑफ-स्पिनर शोएब बशीरच्या जागी ३५ वर्षीय अष्टपैलू लियाम डॉसनचा संघात समावेश केला आहे. बशीरच्या डाव्या बोटात गंभीर फ्रॅक्चर झाले आहे. लॉर्ड्स कसोटीदरम्यान रवींद्र जडेजाचा वेगवान शॉट त्याच्या हाताला लागल्याने त्याला ही दुखापत झाली, त्यानंतर तो मैदानाबाहेर गेला.
दुसरीकडे, लियाम डॉसनसाठी ही एक मोठी संधी आहे. अनुभवी अष्टपैलू खेळाडू असलेल्या लियाम डॉसनने आतापर्यंत इंग्लंडसाठी ३ कसोटी, ६ एकदिवसीय आणि १४ टी-२० सामने खेळले आहेत. या दरम्यान, त्याने कसोटीत ७ विकेट घेतले आणि ८४ धावा केल्या आहेत. तथापि, त्याने २०१७ मध्ये दक्षिण आफ्रिकेविरुद्ध इंग्लंडसाठी शेवटचा कसोटी सामना खेळला. तेव्हापासून तो कसोटी संघाबाहेर होता. पण आता ८ वर्षांनंतर त्याला पुनरागमन करण्याची संधी मिळाली असून, तो चौथ्या कसोटीत खेळेल असे मानले जाते.
दरम्यान, टीम इंडियापूर्वी इंग्लंड संघाने वेस्ट इंडिजविरुद्ध ३ सामन्यांची एकदिवसीय मालिका आणि टी-२० मालिका खेळल्या. डावखुरा फिरकी गोलंदाज लियाम डॉसनचा या टी-२० मालिकेसाठी संघात समावेश करण्यात आला होता. त्याला या मालिकेत खेळण्याची संधीही मिळाली, जो त्याचा ३ वर्षांनंतरचा पहिला आंतरराष्ट्रीय सामना होता.
