प्रयागराज | महाशिवरात्रीच्या पवित्र दिवशी, बुधवारी प्रयागराज महाकुंभ 2025 चा समारोप झाला. या ऐतिहासिक आणि दिव्य उत्सवाच्या यशस्वी आयोजनाबद्दल पंतप्रधान नरेंद्र मोदी यांनी आपल्या ब्लॉगच्या माध्यमातून आपली भावना व्यक्त केली आहे. महाकुंभ हा केवळ धार्मिक मेळा नसून, तो एकतेचा महान यज्ञ असल्याचे त्यांनी म्हटले आहे.
पंतप्रधान मोदींनी ब्लॉगमध्ये लिहिले की, “महाकुंभ संपला आहे… एकतेचा महान यज्ञ पूर्ण झाला आहे. 45 दिवस चाललेल्या या भव्य उत्सवात 140 कोटी देशवासीयांची श्रद्धा एकत्र आली. प्रयागराजच्या या महासंगमात केवळ भाविक नव्हे, तर संपूर्ण राष्ट्र एकसंध भावनेने एकत्र आले.”
पंतप्रधान मोदींनी अयोध्येतील राम मंदिराच्या प्राणप्रतिष्ठा सोहळ्याची आठवण सांगताना म्हटले की, “22 जानेवारी 2024 रोजी अयोध्येत मी देशभक्ती आणि भक्ती यांचे नाते सांगितले होते. प्रयागराज महाकुंभात तेच दृश्य पुन्हा पाहायला मिळाले. येथे संत-महात्मे, स्त्रिया, वृद्ध, युवक—सर्वच समाजघटक एकत्र आले. संपूर्ण राष्ट्राची जागृत जाणीव या महाकुंभात स्पष्ट दिसली.”
पंतप्रधानांनी आपल्या भावनिक शब्दांत लिहिले की, “जेव्हा एखाद्या राष्ट्राची जाणीव जागृत होते, तेव्हा ते शतकानुशतके गुलामगिरीच्या मानसिकतेच्या बेड्या तोडते आणि नवीन चेतनेने उंच भरारी घेते. महाकुंभात या नवचेतनेचा साक्षात्कार झाला.”
महाकुंभाच्या यशस्वी आयोजनामागे प्रशासन, स्वयंसेवक, आणि संपूर्ण भाविक समाज यांचा मोलाचा वाटा आहे. या महासंगमाने भारताच्या आध्यात्मिक आणि सांस्कृतिक शक्तीचे पुन्हा एकदा दर्शन घडवले.
महाशिवरात्रीच्या पावन दिवशी संपन्न झालेला हा महाकुंभ, भाविकांच्या मनात नवीन ऊर्जा आणि राष्ट्रभावनेचा जागर निर्माण करणारा ठरला आहे.
