प्रयागराज : उत्तर प्रदेशातील प्रयागराज येथे महाकुंभमेळ्यादरम्यान झालेल्या भयानक चेंगराचेंगरीत ३० भाविकांचा मृत्यू झाला असून ९० जण गंभीर जखमी झाले आहेत. या दुर्घटनेची अधिकृत माहिती योगी सरकारने जाहीर केली आहे. प्रशासनाने दिलेल्या माहितीनुसार, मृतांपैकी २५ जणांची ओळख पटली आहे.
गर्दीच्या वाढत्या दबावामुळे दुर्घटना
मौनी अमावस्येनिमित्त संगम शहरात मंगळवारी पहाटेपासूनच प्रचंड गर्दी झाली होती. मध्यरात्रीनंतर पहाटे १ ते २ वाजण्याच्या दरम्यान संगम नाक्यावर अचानक मोठी चेंगराचेंगरी झाली. बॅरिकेड तुटल्याने हा अपघात झाल्याचे प्रयागराज मेळा प्रशासनाने सांगितले आहे.
हेही वाचा : हृदयद्रावक ! रेल्वे रुळ ओलांडण विद्यार्थिनीला पडलं महागात; अंगावर शहारे आणणारा व्हिडीओ व्हायरल
प्रशासनाच्या म्हणण्यानुसार, अमृतस्नानासाठी आखाड्यांचे शाही स्नान होणार होते, त्यादरम्यान मोठा जमाव गोळा झाला. सुरक्षा बॅरिकेड्सवर प्रचंड दबाव आल्याने ते तुटले आणि भाविक खाली कोसळले. त्यामुळे लोक एकमेकांवर पडले आणि चेंगराचेंगरीसारखी परिस्थिती निर्माण झाली. रात्री उशिरापर्यंत अनेक भाविक जागेवरच पडून होते, त्यातील काहींना जमावाने चिरडले.
विलंबित मदत आणि प्रशासनाची प्रतिक्रिया
दुर्घटनेनंतर पोलीस आणि प्रशासनाने त्वरित कार्यवाही करत जखमींना रुग्णवाहिकेतून रुग्णालयात हलवले. जखमी भाविकांसाठी ग्रीन कॉरिडॉर तयार करण्यात आला. प्रशासनाने सांगितले की, अनेक भाविक अजूनही गंभीर अवस्थेत आहेत.
उत्तर प्रदेशचे मुख्यमंत्री योगी आदित्यनाथ यांनी या घटनेबद्दल दुःख व्यक्त केले असून जखमींवर त्वरित आणि योग्य उपचार करण्याचे आदेश दिले आहेत. पंतप्रधान नरेंद्र मोदी यांनीही मृतांच्या कुटुंबीयांना सांत्वनपर संदेश दिला आहे.
आयोजकांवर जबाबदारीची टोलवाटोलवी
महाकुंभातील गर्दी नियंत्रणात आणण्याच्या उपाययोजनांबद्दल प्रशासनावर प्रश्नचिन्ह उपस्थित केले जात आहे. घटनास्थळी सुरक्षेच्या उपाययोजना कमी पडल्याची माहिती समोर आली आहे. प्रशासनाच्या प्राथमिक अहवालानुसार, भाविकांची वाढती संख्या लक्षात घेता व्हीव्हीआयपी प्रोटोकॉल पुढे ढकलण्यात आला होता. मात्र, योग्य नियोजनाच्या अभावामुळे ही दुर्घटना घडली.
भाविकांमध्ये संताप आणि चिंता
या दुर्घटनेनंतर भाविकांमध्ये संताप आणि भीतीचे वातावरण आहे. अनेक भाविकांनी सुरक्षेच्या अभावाबाबत तीव्र नाराजी व्यक्त केली आहे. अपघातानंतरच्या गोंधळात अनेक कुटुंबांचे सदस्य हरवल्याच्या तक्रारी समोर येत आहेत.
महाकुंभात झालेल्या या दुर्दैवी घटनेने संपूर्ण देशात हळहळ व्यक्त केली जात आहे. आता प्रशासनाकडून या दुर्घटनेची सखोल चौकशी करून जबाबदार अधिकाऱ्यांवर कारवाई केली जाणार का, याकडे सगळ्यांचे लक्ष लागले आहे.
