---Advertisement---
नशिराबाद, प्रतिनिधी : जळगाव जिल्ह्यातील एका विवाहितेने आपल्या सहा वर्षांच्या मुलीसह धावत्या रेल्वेसमोर स्वत:ला झोकून देत आत्महत्या केल्याची धक्कादायक घटना उघडकीस आली आहे. ही घटना भादली रेल्वे पुलाजवळ घडली असून, या घटनेमुळे परिसरात हळहळ व्यक्त होत आहे. मनीषा चंद्रकांत कावळे (वय २८) आणि त्यांची मुलगी गौरी चंद्रकांत कावळे (वय ६) अशी मृत माय-लेकींची नावे आहेत.
मिळालेल्या माहितीनुसार, नशिराबाद येथील भवानी नगरात मनीषा कावळे या आपल्या पती चंद्रकांत आणि दोन मुलींसोबत राहत होत्या. पती चंद्रकांत हे एमआयडीसीतील एका चटई कंपनीत काम करतात. सोमवारी दुपारी दोनच्या सुमारास पती घरी असताना, मनीषा यांनी लहान मुलगी गौरीसह गावातील एका ओळखीच्या बाईकडून रेशनचा तांदूळ आणायला जात असल्याचे सांगितले.
मात्र, संध्याकाळपर्यंत त्या परत न आल्याने चंद्रकांत यांना चिंता वाटू लागली. त्यांनी पत्नी आणि मुलीचा शोध सुरू केला. मात्र, त्या दोघींचाही काही ठावठिकाणा लागला नाही. त्याच वेळी, भादली रेल्वे पुलाजवळ एक महिला आपल्या लहान मुलीसह रेल्वेखाली आल्याची माहिती पोलिसांना मिळाली.
पोलीस कॉन्स्टेबल रूपेश साळवे आपल्या सहकाऱ्यांसह घटनास्थळी पोहोचले. त्यांनी मृतदेहाची ओळख पटवली असता, ते मनीषा आणि गौरी असल्याचे समोर आले. या घटनेमुळे कावळे कुटुंबीयांवर दुःखाचा डोंगर कोसळला आहे. दरम्यान, आत्महत्येमागचे नेमके कारण अद्याप स्पष्ट झालेले नसून, पोलिसांनी अकस्मात मृत्यूची नोंद केली आहे.
---Advertisement---
