पंतप्रधान नरेंद्र मोदी आज, सोमवारी दुपारी 4 वाजता नवी दिल्लीतील बालयोगी सभागृहात ‘द साबरमती रिपोर्ट’ हा चित्रपट पाहणार आहेत. या चित्रपटाचे पंतप्रधान मोदी यांनी यापूर्वीच कौतुक केले. यात विक्रांत मॅसी मुख्य भूमिकेत असून, हा चित्रपट गुजरातमधील प्रसिद्ध गोध्रा घटनेवर आधारित आहे.
‘द साबरमती रिपोर्ट’ हा चित्रपट गेल्या महिन्यात १५ नोव्हेंबरला थिएटरमध्ये प्रदर्शित झाला होता. चित्रपटाच्या प्रदर्शनादरम्यान पीएम मोदींनी सोशल मीडिया प्लॅटफॉर्मवर चित्रपटाचे कौतुक केले होते. त्यांनी ”ही चांगली गोष्ट आहे की आता सत्य बाहेर येत आहे आणि तेही सर्वसामान्यांना दिसेल अशा पद्धतीने. खोटी कथा केवळ थोड्या काळासाठी टिकते. शेवटी वस्तुस्थिती समोर येते.” असे ते म्हणाले होते.
गृहमंत्री अमित शहा यांनीही ‘द साबरमती रिपोर्ट’ या चित्रपटाचे कौतुक केले. गेल्या महिन्यात 22 नोव्हेंबरला अमित शाह यांनी चित्रपटाच्या निर्मात्यांचीही भेट घेतली होती. सोशल मीडियावर चित्रपटाच्या निर्मात्यांची छायाचित्रे पोस्ट करताना अमित शाह म्हणाले की, “द साबरमती रिपोर्टच्या टीमला भेटलो आणि सत्य समोर आणण्याच्या धाडसाबद्दल त्यांचे अभिनंदन केले.”
हा चित्रपट यूपी-एमपीमध्ये करमुक्त
काही राज्यांमध्ये हा चित्रपट करमुक्त करण्यात आला आहे. मध्य प्रदेशचे मुख्यमंत्री डॉ.मोहन यादव यांनी त्यांच्या राज्यात हा चित्रपट करमुक्त केला. एवढेच नाही तर त्यांनी आपल्या मंत्रिमंडळातील सहकाऱ्यांसोबत हा चित्रपट पाहिला. यावेळी भारतीय जनता पक्षाचे प्रदेशाध्यक्ष विष्णूदत्त शर्मा हेही उपस्थित होते.
केंद्रीय राज्यमंत्री भगीरथ चौधरी यांनीही राजस्थानमधील अजमेर येथे ‘द साबरमती रिपोर्ट’ हा चित्रपट पाहिला होता. चित्रपट पाहिल्यानंतर चौधरी म्हणाले की, “साबरमती अहवालाने सत्य समोर आले आहे. मात्र, व्होटबँकेच्या राजकारणाने संपूर्ण मानवतेलाच लाजवेल, हेही दुर्दैवी आहे. माणसाने नेहमी सत्याचे समर्थन केले पाहिजे. सत्याचा कधीही पराभव होऊ शकत नाही.”
