तरुण भारत लाईव्ह ।१८ फेब्रुवारी २०२३। जालना मधून एक धक्कादायक बातमी समोर येतेय, जालना शहरातील लक्कडकोट भागात असलेल्या रस्त्यांवरील खड्ड्यांमुळे पडल्यावर मागून आलेल्या ट्रकने महिलेला चिरडल्याची घटना घडली आहे. तर स्कूटी चालक मुलगा आनंद योगानंद पवार याच्याही हाताला गंभीर दुखापत झाली आहे.
सूत्राने दिलेल्या माहितीनुसार, औरंगाबाद शहरातील एका ठिकाणी आयोजित वास्तुशांतीचा कार्यक्रम आटपून उषा पवार स्कूटीवरुन आपल्या मुलासोबत जावयाच्या घराकडे निघाल्या होत्या. जालना शहरातील लक्कडकोट भागात असलेल्या रस्त्यांवरील खड्ड्यांमुळे स्कुटीवरून पडल्यावर मागून आलेल्या ट्रकने महिलेला चिरडले. आणि महिलेसोबत असलेल्या मुलाच्या हाताला गंभीर दुखापत झाली आहे. मागून आलेल्या ट्रकने महिलेला चिरडल्यामुळे महिलेचा जागीच मृत्यू झाला.
घटनेची माहिती मिळताच सदर बाजार पोलीस ठाण्याचे पोलीस निरीक्षक तसेच शहर वाहतूक शाखेचे पोलीस कर्मचाऱ्यांनी घटनास्थळी धाव घेतली. यावेळी पोलीस कर्मचाऱ्यांनी मृतदेहाचा पंचनामा करून शव विच्छेदनासाठी सामान्य जिल्हा रुग्णालयात पाठविला.
