एका ‘या’ चुकीमुळे तुमचे खाते होऊ शकते हॅक, जाणून घ्या कोणत्या गोष्टी लक्षात ठेवाव्यात

भारत देशांत UPI हा डिजिटल पेमेंटचा सर्वात लोकप्रिय मार्ग ठरत आहे. या सोबतच त्याच्या सोयी संदर्भातील धोक्यांमध्ये वाढ होत असल्याचे दिसून येत आहे. यात सायबर गुन्हेगार फसवणुकीकरिता नवं नवीन क्लुप्त्या वापरतांना दिसून येत आहेत. आता, नव्या स्वरूपातील जंप घोटाळा समोर येत आहे. जर तुम्ही थोडासा निष्काळजीपणाने UPI पिन टाकला तर तुमचे संपूर्ण खाते हॅक होऊन रिकामे होऊ शकते.

या घोटाळ्यात, सायबर गुन्हेगार प्रथम तुमच्या खात्यात २०० किंवा ३०० रुपये अशी छोटी रक्कम ट्रान्सफर करतो. हे पाहून तुम्हाला वाटते की हा दुसऱ्याचा चुकीचा व्यवहार आहे. यानंतर, घोटाळेबाज तुमच्याशी संपर्क साधतात आणि म्हणतात की पैसे चुकून आले आहेत आणि आता ते त्यांना परत करतात.

हे सायबर गुन्हेगार तुम्हाला त्यांचे पैसे परत पाठविण्याची विनंती करतात यासाठी बनावट लिंक/QR कोड देखील वापरतात. तुम्ही घाबरून तुमचा UPI पिन टाकताच, तुम्ही प्रत्यक्षात पैसे परत करत नाही आहात, तर त्याऐवजी तुम्ही तुमच्या स्वतःच्या खात्यातून फसवणूक करणाऱ्याच्या खात्यात पैसे पाठवत असता.

प्रथम पैसे पाठवून, स्कॅमर तुम्हाला खात्री पटवून देतात की ते खरे वापरकर्ते आहेत. “मी चुकून पैसे पाठवले, कृपया ते ताबडतोब परत करा” असे बोलून ते मानसिक दबाव आणतात. अचानक त्यांच्या खात्यात पैसे आल्याने लोक घाबरतात आणि विचार न करता त्यांचा UPI पिन टाकतात. बरेच वापरकर्ते असे गृहीत धरतात की UPI पिन टाकल्याने फक्त शिल्लक तपासली जाते, तर प्रत्यक्षात ते पेमेंट अधिकृत करते.

जर अचानक खात्यात पैसे आले तर ताबडतोब बँकेशी संपर्क साधा. लक्षात ठेवा, UPI पिन टाकणे म्हणजे पेमेंट अधिकृत करणे, बॅलन्स तपासणे नाही. बँकेच्या अधिकृत सपोर्ट किंवा UPI अॅपशी थेट संपर्क साधा. फसवणूक करणारे नेहमीच घाईघाईने निर्णय घेण्यासाठी तुमच्यावर दबाव आणतात, म्हणून शांतपणे विचार करा. ताबडतोब बँक, UPI अॅप आणि सायबर क्राइम पोर्टलकडे तक्रार करा.