Pahalgam Terror Attack : जम्मू-काश्मीरच्या पहलगाममध्ये झालेल्या दहशतवादी हल्ल्यानंतर देशभरात संतापाचे वातावरण आहे. सामान्य लोकांपासून ते राजकारण्यांपर्यंत, सर्वजण पाकिस्तानविरुद्ध कठोर कारवाईची मागणी करत आहेत. संपूर्ण देश एकमताने भारत सरकारला विनंती करत आहे की, आता पाकव्याप्त काश्मीर (पीओके) भारतात परत आणण्याची वेळ आली आहे.
भारत सरकारने घेतलेल्या कठोर निर्णयांमुळे पाकिस्तान घाबरला आहे. दरम्यान, पाकव्याप्त काश्मीरमध्ये स्थानिक प्रशासनाने सीमेजवळ राहणाऱ्या लोकांना दोन महिन्यांसाठी अन्नधान्य साठवण्याचे आवाहन केले आहे. वृत्तानुसार, पीओकेचे पंतप्रधान चौधरी अन्वरुल हक यांनी विधानसभेत सांगितले की, १३ मतदारसंघांमध्ये दोन महिन्यांसाठी अन्नसाठा साठवण्याचे निर्देश देण्यात आले आहेत.
या १३ मतदारसंघांमध्ये अन्न, औषधे आणि इतर सर्व मूलभूत गरजा पुरवण्यासाठी १ अब्ज रुपयांचा आपत्कालीन निधीदेखील तयार करण्यात आला आहे. नियंत्रण रेषेवरील भागातील रस्त्यांच्या देखभालीसाठी सरकारी आणि खाजगी यंत्रणा देखील तैनात केल्या जात आहेत, असे त्यांनी सांगितले.
भारताच्या कारवाईने पाकिस्तान घाबरला
पाकिस्तानच्या संरक्षणमंत्र्यांनी अलीकडेच म्हटले आहे की, भारत हल्ला करण्याच्या तयारीत असल्याचे विश्वसनीय पुरावे त्यांच्याकडे आहेत. या भीतीमुळे, पीओकेमधील पाकिस्तान अधिकाऱ्यांनी गुरुवारी (१ मे २०२५) १० दिवसांसाठी १००० हून अधिक धार्मिक शाळा बंद ठेवल्या आहेत.
