politics : पंकजा मुंडे यांनी वेळोवेळी आपण भाजपवर नाराज नसल्याचं बोलून दाखवलेलं आहे. मात्र, दुसरीकडे त्यांची गेल्या काही महिन्यांपासून शरद पवार यांच्याशी असलेली जवळीक ही काही लपून राहिलेली नाही. अशातच मुंडे पवार यांच्या संवादाचा दुवा आता प्रताप ढाकणे ठरत आहेत
पुण्यामध्ये ऊसतोड कामगारांच्या प्रश्नासंदर्भात एक बैठक पार पडली. ही बैठक राष्ट्रवादी काँग्रेसचे सर्वेसर्वा शरद पवार यांच्या अध्यक्षतेखाली घेण्यात आली. या बैठकीला हर्षवर्धन पाटील, जयंत पाटील, सुरेश धस यांच्यासह पंकजा मुंडे यांनी देखील ऊसतोड कामगारांच्या वतीने हजेरी लावली. यामध्ये ऊसतोड कामगार आणि कारखानदार यांच्यामध्ये सुरू असलेल्या वादावर तोडगा निघाला असून ऊसतोड कामगारांना ३४ टक्के भाव वाढ देण्यात आली आहे.
मात्र, या बैठकीनंतर पवार मुंडे यांच्यातील जवळीक वाढणार असल्याचं चित्र समोर आल्याने महाराष्ट्रात पुन्हा एकदा नवीन राजकारणाची नांदी सुरू झाली आहे का असा प्रश्न उपस्थित झाला आहे.
गेल्या अनेक दिवसांपासून पंकजा मुंडे भाजपमध्ये अस्वस्थ असल्याच्या चर्चा आहेत. त्या राष्ट्रवादी काँग्रेसमध्ये प्रवेश करणार असल्याचा देखील चर्चा काही दिवसांपूर्वी माध्यमांमध्ये आल्या होत्या. त्यानंतर आता निमित्त लवाद मात्र, मुंडे-पवार संवाद अशीच घटना पुण्यामध्ये घडलेली पाहायला मिळाली. याचं कारण म्हणजे बैठक झाल्यानंतर राष्ट्रवादी काँग्रेसचे बडे नेते प्रतापकाका ढाकणे यांनी पंकजा मुंडे यांच्याशी गर्दी मधून बाजूला घेऊन जात चर्चा केली. आता याचे अनेक राजकीय अर्थ काढले जात असून पंकजा मुंडे भाजपात नाराज असल्याच्या पार्श्वभूमीवर ही भेट बरच काही सांगून जाते आहे.
बैठक झाल्यानंतर पंकजा मुंडे आणि प्रताप काका ढाकणे यांच्यामध्ये झालेली चर्चा ही शरद पवार यांचा निरोप होता का? अशी चर्चा या निमित्ताने आता सुरू झाली आहे. एकीकडे पंकजा मुंडे पाथर्डी मतदारसंघातून निवडणूक लढवण्याच्या चर्चा असताना राष्ट्रवादी काँग्रेस कडून प्रतापकाका ढाकणे हे पाथर्डीचे उमेदवार आहेत त्यामुळे मुंडे-ढाकणे यांची जवळीक ही राज्यातील एक नव्या राजकारणाची नांदी ठरू शकते, असं म्हटलं जातंय.
पाथर्डीच्या भाजपच्या विद्यमान आमदार मोनिका राजळे यांची देवेंद्र फडणवीस यांच्याशी वाढलेली जवळीक पाहता प्रताप ढाकणे आणि पंकजा मुंडे यांच्यातील चर्चा ही ढाकणे यांच्या पथ्यावर पडणारी आहे. तर पंकजा मुंडे यांची राष्ट्रवादीची जवळी देखील या निमित्ताने पुन्हा एकदा समोर आली आहे. ढाकणे यांच्या माध्यमातून पवार मुंडे यांच्या मनोमिलनाच्या चर्चा आता रंगत आहेत.
