नवी दिल्ली : रशियाच्या अध्यक्षपदाच्या निवडणुकीत व्लादिमीर पुतिन यांनी ८८ टक्के मतांनी विजय मिळवला आहे. शुक्रवारी सुरु झालेलं मतदान तीन दिवस चाललं. त्यानंतर लागलेल्या निकालात पुतिन यांनी ८८ टक्के मतं मिळवत विजय मिळवला. पुतिन यांचे कट्टर विरोधक ॲलेक्सी नवलनी यांचा गेल्या महिन्यात आर्क्टिक तुरुंगात मृत्यू झाला. त्यांचे इतर टीकाकार तुरुंगात आहेत. ७१ वर्षीय पुतिन यांच्या विरोधात तीन प्रतिस्पर्ध्यांनी निवडणूक लढवली, मात्र ही लढाई अगदी लुटूपूटूची ठरली. या विजयामुळे सलग पाचव्यांना पुतिन हे रशियाची सूत्रं हाती घेणार आहेत. रॉयटर्सने या विषयीचं वृत्त दिलं आहे.
रविवारच्या निकालांनुसार व्लादिमीर पुतिन यांना ८७.९७ टक्के मतांनी विजय मिळवल्याचं रॉयटर्सने म्हटलं आहे. १९९९ पासून रशियात पुतिनराजच आहे. आता पुतिन पुन्हा एकदा रशियाचे राष्ट्राध्यक्ष म्हणून विराजमान होणार आहेत. रशियाच्या निवडणूक आयोगाच्या अधिकाऱ्यांनी दिलेल्या माहितीनुसार, या राष्ट्रपतीपदाच्या निवडणुकीत ८० लाखांहून अधिक मतदारांनी ऑनलाईन मतदान केलं. रशियाच्या अध्यक्षपदाच्या निवडणुकीत इलेक्ट्रॉनिक मतदानाचा वापर करण्याची ही पहिलीच वेळ होती. व्लादिमीर पुतिन यांनी पहिलं मतदान केलं, त्यानंतर मतदानाला सुरुवात झाली.
पुतिन यांच्याविरोधात शुक्रवार आणि शनिवारी अनेक ठिकाणी निदर्शनं करण्यात आली आणि मतपत्रिका खराब करण्याचा प्रयत्न करण्यात आला. जी निवडणूक झाली ती निष्पक्षपाती आणि स्वतंत्र नव्हती असं अमेरिकेने म्हटलं आहे. मात्र आता पुतिन यांच्या विजयानंतर त्यांचा सहा वर्षांचा कार्यकाळ हा निश्चित झाला आहे. या विजयामुळे पुतिन यांनी दीर्घकाळ सत्तेवर राहण्याचा जोसेफ स्टॅलिन यांचा रेकॉर्ड मोडला आहे.
