जळगाव : उन्हाळ्याच्या तीव्र झळापासून नागरिकांना काहीसा दिलासा मिळण्याची शक्यता आहे. शनिवारी (२६ एप्रिल) ढगाळ वातावरणामुळे तापमानात घसरण दिसून आली. अशात महाराष्ट, मध्य प्रदेश आणि राजस्थानसह २४ राज्यांमध्ये वादळी वाऱ्यासह पावसाची शक्यता वर्तवली आहे. महाराष्ट्रातील सोलापूर, नांदेड, लातूर, धाराशिव, जिल्ह्यांत पुढील ४ दिवस वादळी पावसाचा अंदाज असून, दक्षतेचा इशारा हवामान विभागाने दिला आहे.
विदर्भातील चंद्रपूर, गडचिरोली जिल्ह्यात काही ठिकाणी आज रविवारी गारपीटीचा अंदाज हवामान विभागाने दिला आहे. तर भंडारा, गोंदीया काही ठिकाणी जिल्ह्यात सोमवारी गारपीट होण्याचा अंदाज हवामान विभागाने वर्तविला आहे.
२६ ते २९ एप्रिल दरम्यान बिहार, झारखंड, ओडिशा, पश्चिम बंगाल आणि छत्तीसगडच्या अनेक भागात वादळ, गारपीट आणि मुसळधार पाऊस पडण्याची शक्यता आहे. २६-२७ एप्रिल रोजी सिक्कीममध्येही खूप मुसळधार पावसाचा इशारा देण्यात आला आहे. वादळाच्या काळात शेतकऱ्यांना त्यांची पिके सुरक्षित ठिकाणी नेण्याचा आणि घरातच राहण्याचा सल्ला देण्यात आला आहे.
जळगावातही पावसाचा अंदाज
जळगावात आज रविवारी आणि उद्या सोमवारी पावसाचा अंदाज वर्तविला आहे. आज पावसाचा अंदाज ५० टक्के, तर सोमवारी तो ६० ते ७० टक्के इतका आहे. हा पाऊस झाल्यास उष्णतेची तीव्रता अजून काहीशी कमी होऊ नागरिकांना काहीसा दिलासा मिळण्याची शक्यता आहे.
