जळगाव : शहरातील महामार्गावर अपघाताची मालिका सुरूच असल्याचे दिसून येत आहे. बुधवारी (दि.०५ मार्च ) रात्री पुन्हा एका दुचाकीस्वाराला आपल्या जीव गमवावा लागल्याची घटना शिव कॉलनी स्टॉपवर घडली. भरधाव कंटेनरने जबर धडक देऊन दुचाकीस्वाराला सुमारे ६० फुटांपर्यंत फरफटत नेले. विजय नामदेव भोई (५०) असे मृताचे नाव आहे.
शहरातील महामार्गावर दररोज लहान-मोठे अपघात होत आहेत. यात अनेकांना आपला जीव गमवावा लागत असून, बुधवारी (दि.०५ मार्च ) रात्री पुन्हा एका दुचाकीस्वाराला आपल्या जीव गमवावा लागल्याची घटना शिव कॉलनी स्टॉपवर घडली.
आशाबाबा नगरातील विजय भोई यांची शिव कॉलनी स्टॉपजवळ पानटपरी आहे. बुधवारी रात्री साडेदहाच्या सुमारास ते आपल्या दुचाकीने शिव कॉलनी स्टॉपजवळ येत होते. दरम्यान, स्टॉप ओलांडताना गुजराल पेट्रोल पंपाकडून आकाशवाणीकडे भरधाव वेगाने येणाऱ्या एमएम 09 एजी 1138 क्रमांकाच्या कंटेनरने त्यांना चिरडले. हा अपघात झाल्यानंतर कंटेनर चालकाने सुमारे 60 फुटापर्यंत त्यांना फरफटत नेले. यात विजय भोई यांचा जागीच मृत्यू झाला. विजय भोई यांच्या पत्नीचा सहा महिन्यांपूर्वी मृत्यू झाला असून, आता विजय यांच्या मृत्यूमुळे भोई कुटुंबावर दुःखाचा डोंगर कोसळला आहे.
दरम्यान, अपघातानंतर संतप्त झालेल्या हजारोंच्या जमावाने रस्त्यावर उतरत सुमारे दीड तास रास्ता रोको आंदोलन केले. तसेच काही तरुणांकडून कंटेनरवर दगडफेकही झाल्याने तणाव निर्माण झाल्याचे दिसून आले.
