---Advertisement---
पाचोरा : शिवसेना-उध्दव बाळासाहेब ठाकरे पक्षाच्या पाचोरा – भडगाव मतदार संघाच्या नेत्या वैशाली नरेंद्रसिंग सुर्यवंशी यांनी मंगळवारी (१९ ऑगस्ट) रोजी मुंबई येथे भारतीय जनता पक्षामध्ये प्रवेश केला आहे. त्यांच्या या निर्णयाने त्या राजकीय क्षेत्रातील नवीन इनिंग सुरू करत आहेत.
पाचोरा-भडगाव मतदारसंघातील मातब्बर राजकीय व्यक्तीमत्व म्हणून ख्यात असणाऱ्या वैशाली सुर्यवंशी यांनी आज मुंबई येथील भाजपच्या प्रदेश कार्यालयात आयोजीत कार्यक्रमात पक्षात प्रवेश घेतला. प्रवेश घेण्यापूर्वी मुख्यमंत्री देवेंद्र फडणवीस यांच्यासोबत सविस्तर चर्चा झाली आणि त्यांची सदिच्छा भेट व आशीर्वाद घेऊन प्रवेश केला. जलसंपदा मंत्री गिरीश महाजन व पक्षाचे प्रदेशाध्यक्ष रवींद्र चव्हाण, मंत्री नितेश राणे यांनी वैशाली सुर्यवंशी यांचे स्वागत केले. याप्रसंगी वैशाली यांच्यासोबत त्यांच्या हजारो पदाधिकारी आणि कार्यकर्त्यांनी देखील भारतीय जनता पक्षात प्रवेश घेतला.
जलसंपदा मंत्री गिरीश महाजन यांनी वैशाली सुर्यवंशी यांचे स्वागत केले. त्यांनी यावेळी वैशाली सूर्यवंशी यांच्या पक्ष प्रवेशाने पाचोरा-भडगाव मतदारसंघात पक्षाची ताकद आता मोठ्या प्रमाणात वाढणार असल्याचे प्रतिपादन केले. त्यांनी वैशाली सुर्यवंशी यांना आगामी वाटचालीसाठी शुभेच्छा दिल्या. भाजपचे प्रदेशाध्यक्ष रवींद्र चव्हाण यांनी देखील त्यांचे स्वागत केले.
भारतीय जनता पक्षात प्रवेश घेतल्यानंतर वैशाली सुर्यवंशी यांनी आपण भाजपमधून नवीन वाटचाल सुरू करत असल्याचे सांगितले. त्या म्हणाल्या की, माझे पिताश्री तात्यासाहेब आर. ओ. पाटील यांनी दोनदा युतीचे आमदार म्हणून जनसेवेचा मापदंड प्रस्थापित केला होता. त्यांचा वारसा नेटाने पुढे नेण्यासाठी आपण भारतीय जनता पक्षात प्रवेश घेतल्याचे त्यांनी प्रतिपादन केले. वडिलांचा जनसेवेचा वारसा कायम राखत आपली वाटचाल असेल असे त्यांनी याप्रसंगी आवर्जून नमूद केले.
या प्रवेश सोहळ्याला जलसंपदा मंत्री गिरीश महाजन, मंत्री नितेश राणे, प्रदेशाध्यक्ष रविंद्र चव्हाण, चिटणीस विजय चौधरी आदींची उपस्थिती होती. यावेळी पाचोरा येथील भाजपाचे माजी आमदार दिलीप वाघ, अमोल शिंदे हे आवर्जून उपस्थित होते.
