जळगाव : श्रावण मास संपण्यास दोन दिवस शिल्लक असताना चोरट्यांनी गोठ्यामध्ये बांधलेल्या नऊ शेळ्या व ११ बोकड चोरून नेले. जळगाव तालुक्यातील नांद्रा बुद्रुक येथे ही घटना घडली. या प्रकरणी जळगाव तालुक पोलिस ठाण्यात अज्ञात चोरट्याविरुद्ध गुन्हा दाखल करण्यात आला.
जळगाव तालुक्यातील नांद्रा बुद्रुक गावात चांदसर रस्त्यावर विजय श्रावण बाविस्कर व रवींद्र प्रकाश वाघ या पशुपालकांचा गोठा आहे. ९ सप्टेंबर रोजी रात्री ८ वाजता त्यांनी त्यांच्या मालकीच्या शेळ्या व बोकड गोठ्यात बांधले होते.
त्यानंतर रात्रीपासून ते १० सप्टेंबर रोजी सकाळ सात वाजेपर्यंत अज्ञात चोरट्याने नऊ बकऱ्या व ११ बोकड चोरुन नेले. हा प्रकार लक्षात आल्यानंतर त्यांनी सर्वत्र विचारपुस व शोध घेतला परंतू कोणतीही माहिती मिळाली नाही.
यात पशुपालकांचे ६० हजार रुपयांचे नुकसान झाले आहे. या प्रकरणी विजय बाविस्कर यांनी तालुका पोलिस ठाण्यात फिर्याद दिली. त्यावरून अज्ञात चोरट्याविरुद्ध रविवारी १० सप्टेंबर रोजी दुपारी ३ वाजता जळगाव तालुका पोलीस ठाण्यात अज्ञात चोरट्यांविरोधात गुन्हा दाखल करण्यात आला. पुढील तपास पोहेकॉ ईश्वर लोखंडे करीत आहेत.
