जळगाव : थकित वेतनातील फरकाची रक्कम मंजूर करण्याच्या मोबदल्यात १० हजाराची लाच स्वीकारणाऱ्या मुख्याध्यापकाला लाचलुचपत विभागाच्या पथकाने रंगेहात पकडले. या कारवाईमुळे शैक्षणिक क्षेत्रात खडबड उडाली असून, याबाबत कासोदा पोलीस ठाण्यात गुन्हा नोंदवण्याचे काम सुरू होते. संदीप प्रभाकर महाजन (४४, रा. नेपाने ता. एरंडोल) असे लाचखोर मुख्याध्यापकाचे नाव आहे.
एरंडोल तालुक्यातील एका गावातील शाळेत, तक्रारदार हे शिपाई म्हणून पदावर नोकरीला आहे. गेल्या काही महिन्यांपासून त्यांचे वेतनातील फरकाची रक्कम २ लाख ५३ हजार ६७० रुपये मंजूर करण्याचा प्रस्ताव त्यांनी जळगाव माध्यमिक शिक्षण विभागाचे अधीक्षक त्यांच्याकडे पाठवला होता.
दरम्यान, हा प्रस्ताव मंजूर करून देतो असे सांगून याच शाळेत मुख्याध्यापक असणारे संदीप महाजन यांनी मंजूर रकमेच्या ५% म्हणजे १२,५०० रुपयांची लाचेची मागणी केली. तडजोडी यांची १० हजार रुपये देण्याचे ठरले.
दरम्यान, याबाबत तक्रारदार यांनी जळगाव येथील लाचलुचपत विभागाला तक्रार दिली. त्यानुसार लाचलुचपत पथकाने गुरुवार, २७ जून रोजी दुपारी सापळा रचून १० हजाराची रक्कम स्वीकारताना मुख्याध्यापक संदीप महाजन यांना रंगेहात पकडले. याप्रकरणी कासोदा पोलीस स्टेशनमध्ये गुन्हा दाखल करण्याचे काम सुरू होते.
