मुंबई : विद्यार्थ्यांना आता आपल्या शाळेतच ‘कृषी’ हा विषय देखील शिकता येणार आहे. राज्य सरकारकडून शालेय अभ्यासक्रमात कृषी विषयाचा समावेश करण्याचा निर्णय घेण्यात आला आहे. अभ्यासक्रमात कृषी विषयाचा समावेश करण्याबाबतचा प्राथमिक अहवाल आज मंगळवारी शिक्षण विभागाने स्वीकारला असल्याची माहिती राज्याचे कृषीमंत्री अब्दुल सत्तार यांनी दिली.
तसेच याबाबत तज्ज्ञांची समिती नेमून अभ्यासक्रमाचा आराखडा निश्चित केला जाणार असल्याचेही मंत्री सत्तार यांनी सांगितले. कृषिमंत्री सत्तार यांनी यासंदर्भातील अहवाल शालेय शिक्षण मंत्री दीपक केसरकर यांच्याकडे सुपूर्त केला.
कृषी शिक्षणविषयक एकात्मिक आराखडा तयार करताना इयत्ता पहिली ते पाचवी, सहावी ते आठवी आणि नववी ते दहावी अशा पद्धतीने अभ्यासक्रम ठेवावा. कृषी विषयक प्रशिक्षणासाठी जे जे साहित्य आणि मदत लागेल, ते करण्याची कृषी विभागाची भूमिका असल्याचे अब्दुल सत्तार यांनी यावेळी सांगितले.
तसेच शालेय अभ्यासक्रमातील इतर सर्व विषयांच्या सहसंबंधातून शेतीचे महत्व, उपयोजना, व्यवसाय संधी, शेतीविषयक जाणीव अशा अनेक पैलूंकडे लक्ष केंद्रीत करुन विद्यार्थ्यांचा सर्वांगीण विकास साधणे शक्य होईल, असा विश्वास मंत्री सत्तार यांनी व्यक्त केला.
