सोलापूर : मोहोळ तालुक्यातून एक मन सुन्न करणारी घटना समोर आली आहे. आईच्या नावावर असलेली शेतजमीन नावावर करण्यासाठी दोन भावांमध्ये वाद झाला. हा वाद इतका विकोपाला गेला की नराधम काकाने आपल्या सख्या पुतणीची हत्या करून मृतदेह नदीत फेकला. ज्ञानदा यशोधन धावणे (वय ४ वर्ष) असे हत्या करण्यात आलेल्या चिमुकलीचं नाव आहे. या प्रकरणी एकाविरोधात पोलिसांत गुन्हा दाखल करण्यात आला आहे.
मोहोळ तालुक्यातील डिकसळ इथला रहिवासी असलेल्या यशोधन शिवाजी धावणे यांची वडीलोपार्जित १६ एकर शेतजमीन आहे. यातील ५ एकर जमीन ही त्यांच्या नावे आणि ५ एकर भाऊ यशोदीप यांच्या नावावर आहे. तर उर्वरित सहा एकर जमीन ही आईच्या नावे आहे. फिर्यादी यशोधन धावणे यांनी दिलेल्या जबाबानुसार आईच्या नावावर असलेली ६ एकर शेतजमीन ही आपल्या नावावर करुन द्यावी यासाठी संशयित आरोपी यशोदीप हा सातत्याने भांडण करत होता.
गावातील लोकांनी बैठक घेत त्याची समजूत काढण्याचा देखील प्रयत्न केला होता. मात्र, तरीही त्यांच्यात वाद सुरू होते. दरम्यान, सोमवारी (२० फेब्रुवारी) पुन्हा यशोधन आणि यशोदीप या दोन्ही भावात वाद झाला. आज तुमचा फैसलाच करतो असे म्हणत यशोदीपने यशोधनला शिवीगाळ केली. तसेच तुमचा वंश संपवतो अशी धमकी दिली.
दरम्यान, गावकऱ्यांनी पुन्हा एकदा मध्यस्थी करत त्यांचे भांडण मिटवले. त्यानंतर चिमुकल्या ज्ञानदाचे वडील यशोधन हे आई आणि पत्नीसह शेतात गेले. काही कामानिमित्त घरी परतल्यानंतर घरात मुलगी ज्ञानदा आणि वडील शिवाजी हे दोघे घरात दिसून आले नाही. त्यामुळे त्यांनी वडील शिवाजी यांना फोन केला असता मी मंदिरात दर्शनासाठी आलो असून ज्ञानदा घरात झोपलेली असल्याचं सांगितलं.
मात्र, ज्ञानदा घरात नसल्याने त्यांनी आसपास चौकशी केली असता भाऊ यशोदीपने ज्ञानदाला गाडीवर नेल्याचे काही जणांनी सांगितलं. यावेळी भाऊ यशोदीपला फोन लावल्यानंतर मी तुझ्या मुलीला मलिकपेठ येथील सीना नदीच्या पात्रात फेकून दिलं असं सांगितलं.
याप्रकरणी यशोधन यांनी दिलेल्या तक्रारीवरून आरोपी यशोदीप याच्याविरोधात पोलिसांत गुन्हा दाखल करण्यात आला. पुढील तपास पोलीस करत आहेत.
