जळगाव : पोहण्यासाठी गेलेल्या तरुणाचा चिखलात अडकल्याने गुदमरून मृत्यू झाला. सोपान संजय महाजन (१९) असे मयत तरुणाचे नाव आहे. तालुक्यातील शिरसोली शिवारात आज दुपारी २ वाजेच्या सुमारास ही घटना घडली. यावेळी घटनास्थळी नातेवाईकांसह मित्रांनी एकच आक्रोश केला. याबाबत एमआयडीसी पोलीस ठाण्यात अकस्मात मृत्यूची नोंद करण्यात आलीय.
पोलीस सूत्रानुसार, जळगाव तालुक्यातील शिरसोली येथे सोपान संजय महाजन (१९) हा तरुण वास्तव्यास आहे. दरम्यान, आज शुक्रवारी तो त्याच्या दोन मित्रासह चभारदरी धरणाजवळ गेला. यावेळी धरणाच्या काठावर काही वेळ बसल्यानंतर सोपान महाजन हा पोहण्यासाठी धरणाच्या पाण्यात उतरला. धरणात चिखल असल्यामुळे उडी मारल्यानंतर तो फसला, धक्कादायक म्हणजे, त्याचा पाण्यात गुदमरून मृत्यू झाला.
यामुळे घाबरलेल्या दुसऱ्या मुलाने आरडाओरड केली. गावातील काही मित्रमंडळी व ग्रामस्थांशी संपर्क साधून घटनेबाबत माहिती दिली. ग्रामस्थांनी व मित्रांनी घटनास्थळी धाव घेतली सोनू महाजन याला धरणाबाहेर काढून शासकीय वैद्यकीय महाविद्यालय व रुग्णालय, जळगाव येथे उपचारासाठी दाखल करण्यात आले असता तेथे वैद्यकीय अधिकाऱ्यांनी मयत घोषित केले.
या घटनेबाबत एमआयडीसी पोलीस ठाण्यात अकस्मात मृत्यूची नोंद घेण्याचे काम सुरू होते. मयत सोनू महाजन हा मनमिळावू व चांगल्या स्वभावाचा असल्याने त्याच्या मृत्यूची वार्ता कळताच त्याच्या कुटुंबीयांनी एकच आक्रोश केला. रुग्णालयात नातेवाईकांची गर्दी झालेली आहे सोनू महाजन याच्या पश्चात आई, वडील, भाऊ, बहीण असा परिवार आहे.
