नाशिक । मुलीच्या प्रेमविवाहाचा रागातून पतीने थेट पत्नीचा जीव घेतल्याची खळबळजनक घटना गंगापूर परिसरात घडली आहे. सविता गोरे असे मृत विवाहित महिलेचे नाव असून, या घटनेमुळे संपूर्ण शहर हादरले आहे.
मिळालेल्या माहितीनुसार, गंगापूर परिसरातील स्वस्तिक निवास सोसायटीतील फ्लॅटमध्ये मयत सविता गोरे आणि पती छत्रगुण गोरे हे भाड्याने राहत होते. मंगळवारी, 5 फेब्रुवारी रोजी सविता आणि छत्रगुण गोरे यांच्यात त्यांच्या मुलीच्या प्रेमविवाहावरून वाद झाला.
काही दिवसांपासून दाम्पत्यात त्याच विषयावर तणाव होता. मंगळवारी, सविता आणि छत्रगुण दोघेच घरी होते, त्यावेळी वाद उफाळला. संतापलेल्या छत्रगुण यांनी रागाच्या भरात सविता यांच्यावर कोयत्याने हल्ला केला आणि त्यानंतर कुकरच्या झाकणाने तिच्या शरीरावर वार केले. या मारहाणीमुळे सविता यांचा जागीच मृत्यू झाला.
छत्रगुण हा घटनेनंतर घटनास्थळावरून फरार झाला. घटनेची माहिती मिळताच गंगापूर पोलिसांनी त्वरित घटनास्थळी धाव घेत पंचनामा केला. या प्रकरणी पोलिसांनी आरोपी पतीविरोधात गुन्हा दाखल करून त्याला ताब्यात घेतले असून, पुढील तपास सुरू केला आहे.
शिकारीसाठी गेले अन् प्राणी समजून सहकाऱ्याचीच केली शिकार
पालघर : जिल्ह्यातील मनोर पोलीस ठाण्याच्या हद्दीतील बोरशेती गावाजवळ जंगलात शिकारीसाठी गेलेल्या गटात मोठी दुर्घटना घडली आहे. मंगळवारी रात्री (४ फेब्रुवारी) ८.४० वाजता, प्राणी समजून चुकून ट्रिगर दाबल्याने ६० वर्षीय रमेश जाण्या वरठा यांचा मृत्यू झाला. या घटनेत त्यांचा एक सहकारीही जखमी झाला आहे.
मिळालेल्या माहितीनुसार, रमेश जाण्या वरठा आणि त्यांचे सहकारी रात्रीच्या सुमारास बोरशेतीच्या जंगलात शिकारीसाठी गेले होते. दरम्यान प्राणी समजून एकास सहकार्याकडून चुकून बंदुकीचे ट्रिगर दाबलं गेलं.आणि यात एका इसमाचा जागीच मृत्यू झाला आहे .दुर्घटना घडल्यानंतर मृतदेह जंगलातच सोडून सहकारी पसार झाले होते.
गटातील काहीजण झाडांवर बसले होते, तर काहीजण जमिनीवर होते. उशिरा आलेल्या काही सहकाऱ्यांनी मोबाईल टॉर्च सुरू केला नसल्याने प्राणी येत असल्याचा त्यांचा संशय बळावला आणि सहकार्याने चुकून बंदुकीचा ट्रिगर दाबला. गोळी लागल्याने रमेश जाण्या वरठा यांचा जागीच मृत्यू झाला.
सहकार्याचा मृत्यू झाला हे लक्षात येताच मृत सहकार्याला तसेच टाकून इतर सहकार्यांनी जंगलातून पळ काढला .जंगलात मृतदेह सापडल्याने आजूबाजूच्या परिसरात मोठी खळबळ उडाली.
घटना घडल्यानंतर मृतदेह जंगलातच सोडून इतर शिकारी पसार झाले. मात्र, आजूबाजूच्या गावकऱ्यांनी जंगलात मृतदेह आढळल्यानंतर पोलिसांना कळवले. मनोर पोलिसांनी तातडीने कारवाई करत सात ते आठ जणांना ताब्यात घेतले असून पुढील तपास सुरू आहे.
या घटनेने अवैध शिकारीच्या घटनांवर मोठे प्रश्नचिन्ह निर्माण झाले आहे. गावठी कट्ट्यांचा वाढता वापर आणि शिकारीसाठी होणारी बेकायदेशीर हालचाल रोखण्यासाठी प्रशासन काय पावले उचलणार, हा महत्त्वाचा मुद्दा ठरतो. या प्रकरणाचा सखोल तपास सुरू असून पोलिस अधिक तपशील लवकरच जाहीर करणार आहेत.
