पहलगाम येथून सुरू होणारी अमरनाथ यात्रा रद्द होणार का? समोर आली मोठी अपडेट

Pahalgam Terror Attack : जम्मू-काश्मीरच्या पहलगाममध्ये मंगळवारी झालेल्या दहशतवादी हल्ल्यामुळे बैसरन खोऱ्यात अद्याप भीतीचे वातावरण आहे. अर्थात, सुरक्षा व्यवस्था वाढवण्यात आली असली तरी लोकांच्या मनात अजूनही भीती आहे, ज्यामुळे अनेक पर्यटकांनी काश्मीरला भेट देण्यासाठी केलेले बुकिंग रद्द केले आहे. दुसरीकडे, अमरनाथ यात्रा देखील तीन महिन्यांनी होणार आहे. त्यामुळे आता अमरनाथ यात्रा होणार की नाही? याबद्दल प्रश्न उपस्थित केले जात आहेत. आता यावर मोठी अपडेट समोर आली आहेत.

पहलगाममधील या दहशतवादी हल्ल्यात सुमारे ८ ते १० दहशतवादी सहभागी होते, त्यापैकी दोन ते तीन स्थानिक मदतनीस होते आणि ५ ते ७ दहशतवादी पाकिस्तानी वंशाचे होते, अशी माहिती समोर आली आहे. स्थानिक लोकांच्या मदतीने त्यांनी परिसरात हा हल्ला केला. कोणालाही संशय येऊ नये म्हणून दहशतवादी स्थानिक भाषेत बोलत होते, अशी माहितीही समोर आली आहे. या हल्ल्यात २८ जणांचा मृत्यू झाला असून, अनेक जण जखमी झाले आहेत.

अमरनाथ यात्रा होणार की नाही?

उत्तर आहे- हो. ३ जुलैपासून सुरू होणारी अमरनाथ यात्रा रद्द केली जाणार नाही. भाविकांनी घाबरू नये, या यात्रेसाठी नवीन सुरक्षा योजना लागू केली जाईल, अशी माहिती जम्मू-काश्मीरचे उपमुख्यमंत्री सुरिंदर चौधरी यांनी दिली.

सुरक्षा वाढवली जाणार!

एक विशेष केंद्रीय कमांड सेंटर २४ तास देखरेख ठेवेल. सर्व संक्रमण शिबिरांवर कडक सुरक्षा व्यवस्था असेल. ड्रोन आणि इतर प्रकारच्या इलेक्ट्रॉनिक देखरेखीमध्ये आणखी वाढ केली जाईल. यात्रेदरम्यान सहसा तैनात असलेल्या दीड लाख सुरक्षा कर्मचाऱ्यांची संख्याही वाढवण्यात येईल, अशी माहिती समोर आली आहे.

दरम्यान, खरं तर, दरवर्षी अमरनाथ यात्रेला मोठ्या संख्येने भाविक पोहोचतात. याचा परिणाम केवळ अमरनाथ यात्रेवरच नाही तर वैष्णोदेवी धाम यात्रेवरही होऊ शकतो. मोठ्या संख्येने पर्यटकांवर झालेल्या या हल्ल्यामुळे लोकांमध्ये भीतीचे वातावरण पसरले आहे.