नवी दिल्ली : मुकेश अंबानी, गौतम अडाणी यांच्यासारख्या गर्भश्रीमंत उद्योगपतींकडे अनेक महागड्या कार्स असतात. मात्र अंबानी-अडाणी यांच्याकडेही नाही इतकी महागडी कार हैदराबादमधील एका उद्योगपतीने खरेदी केली आहे. ही देशातील सर्वात महागडी कार आहे. हैदराबादमधील व्यावसायिक नसीर खान यांना देखील आलिशान गाड्यांची खूप आवड आहे. त्यांनी नुकतीच एक सुपरकार खरेदी केली आहे. मॅकलॉरेन ७६५ एलटी स्पायडर (McLaren 765 LT Spider) असं या कारचं नाव आहे.
नसीर खान यांनी त्यांच्या इन्स्टाग्राम अकाउंटवर त्यांच्या नवीन सुपरकारचा फोटो अपलोड केला आहे. सध्या मॅकलॉरेन ७६५ एलटी स्पायडर या कारची भारतातली किंमत १२ कोटी रुपये इतकी आहे. या कारमध्ये कंपनीने ४.० लीटर ट्विन टर्बोचार्ज्ड व्ही ८ पेट्रोल इंजिन देण्यात आलं आहे. हे इंजिन ७६५ पीएस पॉवर आणि ८०० न्युटन मीटर टॉर्क जनरेट करू शकतं. ७ स्पीड सिक्वेन्शियल गिअरबॉक्ससह सुसज्ज कार पॉवर आणि स्पीडच्या बाबतीत दमदार आहे.
नसीर खान यांच्याकडे एकापेक्षा एक महागड्या लग्झरी कार्स आहेत. यात रोल्स रॉयस कुलिनन ब्लॅक, लॅम्बोर्गिनी हुराकेन, लॅम्बोर्गिनी ऊरूस, लॅम्बोर्गिनी अ‍ॅव्हेंटडोर, फोर्ड मस्टँग, फेरारी, जीएमसी सिएरा, मर्सिडीज बेन्झ एएमजी जी ६३, मर्सिडीज बेन्झ जी क्लाससह अनेक कार्सचा समावेश आहे.
https://www.instagram.com/p/CmE2E8kpt2h/?utm_source=ig_web_copy_link
