नागपूर : लोकसभा निवडणुकीचा कार्यक्रम केंद्रीय निवडणूक आयोगानं नुकताच जाहीर केला, त्याचबरोबर देशभरातील काही पोटनिवडणुकांच्या निवडणुकाही जाहीर करण्यात आल्या होत्या. यामध्ये महाराष्ट्रात अकोला पश्चिम मतदारसंघात विद्यमान आमदार गोवर्धन शर्मा यांच निधन झाल्यानं ही जागा रिक्त झाली होती.
अकोला पश्चिम विधानसभा मतदारसंघात भारतीय जनता पक्षाचे नेते तथा आमदार गोवर्धन शर्मा यांनी २९ वर्षे भाजपचा झेंडा मतदारसंघावर फडकवला होता. मात्र, ३ नोव्हेंबर २०२३ रोजी त्यांचे निधन झाले. तेव्हापासून या मतदारसंघाची जागा रिक्त होती. त्यामुळे निवडणूक आयोगाने लोकसभेच्या निवडणूकीबरोबरच दुसऱ्या टप्प्यात २६ एप्रिल रोजी अकोला पश्चिम विधानसभा मतदारसंघासाठी निवडणूक जाहीर केली होती. मात्र निवडणूक आयोगाच्या या निर्णयाविरोधात मुंबई उच्च न्यायालयाच्या नागपूर खंडपीठात याचिका दाखल करण्यात आली होती. या याचिकेवर सुनावणी झाल्यानंतर उच्च न्यायालयाने ही निवडणूक रद्द करण्याचे आदेश निवडणूक आयोगाला दिले आहेत.
