चोपडा ः अज्ञात वाहनाने दुचाकीला उडवल्याने झालेल्या अपघातात पिंपरखेडा गावातील 24 वर्षीय युवक ठार झाला. हा अपघात चोपडा ते धरणगाव रस्त्यावर घडला. तुषार मधुकर सोनवणे (24, पिंपरखेडा, ता.जामनेर) असे मयत तरुणाचे नाव आहे. अज्ञात वाहनाच्या धडकेने अपघात जामनेर तालुक्यातील पिंपरखेडा येथील तुषार सोनवणे हा त्याचा मित्र तथा जामनेर तालुक्यातील सामरोद येथील रहिवासी सौरव गजानन सपकाळ (21) हे दोघेही गुरुवार., 12 रोजी दुपारी पावणेचार वाजेच्या सुमारास चोपड्याकडून जामनेरकडे जात असताना चोपडा ते धरणगाव रस्त्यावरील मजरेहोळ गावाचा फाटा ते चोपडा सूतगिरणीदरम्यान त्यांच्या दुचाकीला अज्ञात वाहनाने धडक दिली.
या अपघातात तुषार मधुकर सोनवणे हा गाडीखाली आल्याने जागीच ठार झाला तर सौरव सपकाळ हा देखील जखमी झाला. मृत तुषार सोनवणे हा जामनेर शहरात सलून दुकानावर कामाला होता. त्याच्या पश्चात आई-वडील, दोन बहिणी असा परीवार आहे. तो घरातला कर्ता व एकुलता एक असल्याने कुटुंंबावर दुःखाचा डोंगर कोसळला. अपघाताची माहिती मिळताच आई-वडिलांसह बहिणींनी काळीज चिरणारा आक्रोश केला. चोपडा उपजिल्हा रुग्णालयात शवविच्छेदन केल्यानंतर तुषार सोनवणे याचा मृतदेह नातेवाईकांच्या ताब्यात देण्यात आला. याप्रकरणी चोपडा शहर पोलीस ठाण्यात अकस्मात मृत्यूची नोंद करण्यात आली.
