शिरपूर: बिघाड झालेल्या उभ्या ट्रकला मागून मोटारसायकलने जबरदस्त धडक दिल्याने बापलेकाचा जागीच मृत्यू झाला. तर अन्य एक जण गंभीर जखमी झाल्याची घटना २२ मार्च रोजी रात्री १२ च्या सुमारास छत्रपती संभाजीनगर-नागपूर महामार्गावर किन्हीराजा येथील शिवाजी शाळेजवळ घडली. या अपघातात नवलचंद धर्माजी वाघमारे (५५) व आशिष नवलचंद वाघमारे (३३) रा. कानगाव जि. वर्धा हे जागीच ठार झाले.
तर दादाराव निकम हे गंभीर जखमी आहेत. किन्हीराजा येथील शिवाजी शाळेजवळ एमएच-०४/एफयू- ९९८३ क्रमांकाचा ट्रक नादुरुस्त झाल्याने संभाजीनगर-नागपूर रोडवर उभा होता. एमएच- २०/ बीई-२३४४ क्रमांकाच्या मोटारसायकलने तिघे संभाजीनगरवरून हिंगणघाट तालुक्यातील कानगावकडे जात होते. रात्री १२ वाजता बंद पडलेला ट्रक उभा आहे की धावत आहे, याचा अंदाज न आल्याने मोटारसायकल ट्रकवर आदळली.
यात बापलेकाचा हकनाक बळी गेला. अपघात घडताच जऊळका पोलिस स्टेशनचे कर्मचारी व किन्हीराजा प्राथमिक आरोग्य केंद्रातील रुग्णवाहिकाचालकासह नागरिकांनी अपघातग्रस्तांना तातडीने वाशीम रुग्णालयात दाखल केले. गंभीर जखमीवर वाशीम येथील खाजगी रुग्णालयात उपचार सुरू आहेत.
