जामनेर : भरधाव कंटेनरने चारचाकी पिकअपला जबर धडक दिल्याने झालेल्या भीषण अपघातात पिकअप चालकासह तिघे ठार झाले. मृतांमध्ये पैठणच्या दोघांचा तर मध्यप्रदेशातील एकाचा समावेश आहे. मुक्ताईनगर-छत्रपती संभाजीनगर महामार्गावर सोमवारी दुपारी चार वाजेच्या सुमारास हा अपघात घडल्याचे सांगण्यात आले. अल्लाउद्दीन गयासोद्दीन शेख (40), शेख समीर शेख नजीर (20) व वाहन चालक साजन जगन बडोले (25, तिघे रा.बालानगर, ता.पैठण) अशी मृतांची नावे आहेत.
बालानगर येथून फळांच्या खरेदीसाठी खंडव्याकडे पिकअप (एम.एच.20 डी.ई.5548) द्वारे चालकासह तिघे निघाल्यानंतर जामनेर येथील रेल्वे गेट व टाकळी गावाच्या मध्ये असलेल्या नागदेवता मंदिराजवळील वळणावर सोमवारी दुपारी चार वाजेच्या सुमारास भुसावळकडून डाक पार्सल घेवून भरधाव कंटेनर (आर.जे.32 जी.सी.0789) जात असताना कंटेनरची जबर धडक बसली. अपघाताची माहिती मिळताच पोलिसांनी घटनास्थळी धाव घेतली. कंटेनर चालक मात्र पसार झाला. अपघातप्रकरणी जाबीर हुसेन पठाण (47, बालानगर, पैठण) यांच्या फिर्यादीवरून कंटेनर चालकाविरोधात गुन्हा दाखल करण्यात आला. तपास उपनिरीक्षक सागर काळे करीत आहेत.
