Fake Jobs Emails : सध्याच्या युगात नोकरी शोधणे खूप सोपे झाले असे म्हणणे चुकीचे ठरणार नाही. सध्या असा अनेक वेबसाईट्स उपलबध आहेत ज्या तुम्हाला अगदी घरबसल्या नोकरी मिळवून देऊ शकतात. पण, तुम्हाला येणारी जॉब ऑफर खरी की खोटी? हे ओळखणे हे फार कठीण झाले आहे.
नोकऱ्यांचे अमिश दाखवणाऱ्या अनेक साइट्स आहेत, जिथे फक्त रेझ्युम, तुमचे वैयक्तिक आणि व्यावसायिक तपशील अपलोड करून जॉब ऑफर येऊ लागतात. पण ते सर्व बरोबर आहेत की नाही? याबाबतची शंका कायम असते. सायबर क्राईम पोलिसांत यासंदर्भातील अनेक फसवणुकीच्या तक्रारी येत असतात. त्यामुळे खोट्या जॉबच्या ऑफर कशा ओळखायच्या? त्यातून कसं स्वत:ला वाचवायचं? याचा तपशील जाणून घेऊया.
आपल्याला बऱ्याचदा ईमेलवर जॉब ऑफर आलेली पाहून आनंद होतो. यामध्ये आपल्याला चांगले पद आणि पगाराची नोकरी ऑफर झालेली असते. पण या आनंदाच्या भरात आपण त्या ईमेल आणि जॉब ऑफरची सत्यता तपासत नाही. कोणतीही मुलाखत न घेता आकर्षक पगाराच्या पॅकेजसह ऑनलाइन जॉब ऑफर येत असेल तर ही सायबर फसवणूक असू शकते.
अशी होते नोकरीच्या नावे आपली फसवणून :
१) तुमच्याकडे कामाचा कोणत्याही प्रकारचा अनुभव नसेल आणि तरीही तुम्हाला मोठे प्रोफाइल आणि पगाराची ऑफर येत असेल. तर संशय निर्माण होण्यासारखी स्थिती आहे.
२) जर तुम्हाला स्पॅम ई-मेलद्वारे नोकरीची ऑफर आली असेल तर वेळीच सतर्क होणे आवश्यक आहे. असे ऑफर लेटर कधीही स्वीकारू नका. त्यावर क्लिक करण्याचीही गरज नाही.
३) अनेक वेळा बनावट वेबसाईटच्या माध्यमातून नोकरीची जाहिरात केली जाते. कुठेही अर्ज करण्यापूर्वी किंवा ऑफर लेटर स्वीकारण्यापूर्वी ती वेबसाइट नीट तपासा.
४) उमेदवारांना चांगल्या पदाचे आणि जास्त पगाराच्या पॅकेजचे आमिष दाखवून त्या बदल्यात पैशांची मागणी केल्याचे अनेक ठिकाणी दिसून आले आहे.
५)अनेकदा राज्य किंवा देशाबाहेरील नंबरहून नोकरीसाठी फोन येतात. नोकरीसाठी पैसे भरण्यास सांगितले जातात. त्या नंबरवर पुन्हा फोन लागत नाहीत. अशावेळी सतर्क राहणे आवश्यक आहे.
ऑफरची सत्यता कशी तपासायची?
१) ऑफर लेटरमध्ये नोकरीच्या भूमिकेशी संबंधित माहिती नीटपण वाचून घ्या. त्यात काही अटी असतील तर समजून घ्या अन्यथा चुकूनही त्यावर सही करू नका.
२) कंपनीचा लोगो, नाव आणि इतर तपशील नीट तपासा. वेगवेगळ्या प्लॅटफॉर्मवर देखील त्याची क्रॉस चेक करा. तुमच्या ओळखीत तिथे कोणी नोकरी केली का? ते पाहा. केली असेल तर त्यांच्याकडून माहिती घ्या.
३) ऑफर लेटर तुम्हाला अधिकृत ईमेल आयडीद्वारे पाठवले गेले आहे की नाही ते तपासा. अनेकदा आयडी अधिकृत दिसत असला तरी प्रत्यक्षात तो फेक असतो.
४) कंपनीचे अधिकृत सोशल मीडिया प्रोफाइल तपासा. गुगलवर कंपनीबद्दलचे रिव्ह्यू तपासा. यातून तुम्हाला बरीचशी माहिती मिळेल.
