भडगाव : शिवसेना (उबाठा) गटाच्या नेत्या वैशाली सूर्यवंशी यांनी त्यांच्या प्रचारार्थ वैयक्तिक मजकूर व छत्रपती शिवाजी महाराज यांचा फोटो असलेले पोस्टराची विटंबना झाली आहे. महाराजांच्या फोटोची विटंबना करणाऱ्या सर्व घटकांवर गुन्हा दाखल व्हावा अन्यथा भारतीय जनता पार्टी भडगाव तालुका म्हणून तीव्र आंदोलन करण्यात येईल असा इशारा निवेदनाद्वारे करण्यात आली.
दोन – तीन दिवसापूर्वी भडगाव शहरात उद्धव बाळासाहेब ठाकरे शिवसेना पक्षाच्या नेत्या वैशाली सूर्यवंशी यांनी त्यांचा प्रचारार्थ वैयक्तिक मजकूर व आपले आराध्य दैवत छत्रपती शिवाजी महाराज यांचा फोटो असलेले पोस्टर भडगाव शहरासह विधानसभा क्षेत्रात गल्लीबोळात लावली आहेत.
ते लावत असताना त्यांनी कुठल्याही प्रकारची दक्षता न घेता, गटारींच्यावर असलेल्या भिंतीवर, मुतारीच्या भिंतीवर, अडगळीत पडलेल्या भिंतीवर व दुकानांच्या शटरवर ही पोस्टर लावण्यात आलीत. काही ठीकणी समाजकंटकांनी शिवाजी महाराजांच्या फोटोची विटंबना केली. हा प्रकार लक्षात आल्यानंतर संबंधित पक्षाच्या पदाधिकाऱ्यांना काही नागरिकांनी सूचनाही केल्या होत्या. परंतु यांनी कोणत्याही प्रकारची दखल न घेता या गंभीर प्रकाराकडे दुर्लक्ष केले हा प्रकार तीन दिवसांपूर्वी जेव्हा पूर्ण शहरात समजला तेव्हा शहरातील तरुण मोठ्या प्रमाणात पोलीस स्टेशनला जमा झाले. त्यानंतर पोलिसांनी अज्ञातावर गुन्हा दाखल केला आहे.
परंतु या प्रकरणात पोस्टर प्रकाशक व पोस्टर लावणारे हेही तेवढेच गुन्हेगार आहेत. कारण की मुतारीवर व गटारीवर महाराजांची प्रतिमा असलेले पोस्टर लावणे म्हणजे एक प्रकारे विटंबनाच आहे. तसेच शटरवर लावलेले पोस्टरही शटर उघडल्यावर फाटणार आहे असे माहित असून देखील ते पोस्टर लावणे म्हणजेच महाराजांच्या प्रतिमेची विटंबनाच आहे. म्हणून महाराजांच्या प्रतिमेची विटंबना करणाऱ्या सर्व घटकांवर गुन्हा दाखल व्हावा अन्यथा भारतीय जनता पार्टी भडगाव तालुका म्हणून तीव्र आंदोलन करण्यात येईल.
निवेदनावर भाजप तालुकाध्यक्ष सोमनाथ पाटील, भाजयुमो विधानसभा संयोजक किरण शिंपी, भडगाव शहर अध्यक्ष धर्मेंद्र परदेशी, शहराध्यक्ष नरेंद्र पाटील व भाजयुमो शहराध्यक्ष विशाल चौधरी यांची स्वाक्षरी आहे. निवेदनाची प्रत उपमुख्यमंत्री तथा गृहमंत्री देवेंद्र फडणवीस, जिल्हाधिकारी जळगाव व पोलीस अधीक्षक जळगाव यांना माहितीस्तव पाठविण्यात आली आहे.
