जळगाव : भरधाव डंपर आणि ओमनी कार यांच्यात झालेल्या भीषण अपघातात पाच जण गंभीर जखमी झाल्याची घटना आज रोजी सकाळी ११ वाजेच्या सुमारास सुनसगाव येथे घडली. जखमींना शासकीय वैद्यकीय महाविद्यालयात दाखल करण्यात आले असून, या घटनेबाबत अद्याप कोणतीही नोंद करण्यात आलेली नाही.
बोदवड येथील विविध कार्यकारी सोसायटीचे कर्मचारी खाजगी ओमनी वाहनाने शुक्रवार, २ ऑगस्ट रोजी सकाळी जळगाव येथे काही कामानिमित्त निघाले होते.
दरम्यान, जळगाव तालुक्यातील सूनसगाव जात असताना भरधाव डंपरने सकाळी ११ वाजेच्या सुमारास त्यांना जबर धडक दिली. या भीषण अपघातामध्ये ओमनी कारमधील विविध कार्यकारी सोसायटीचे गट सचिव सुभाष प्रभाकर बावस्कर ( ५२), कारकून रामदास देवराम मोरे (५०), सोसायटीचे सेल्समन प्रकाश निना सोनार ( ४०) यांचेसह चालक कैलास पुंडलिक सुशीर ( ५०) हे गंभीर जखमी झाले आहेत तर नीना कैलास सुशीर ( ३१) या तरुणाला किरकोळ मार लागला आहे.
हा अपघात घडल्यानंतर परिसरातील नागरीकांनी तात्काळ धाव घेवून जखमींना खासगी वाहनातून शासकीय वैद्यकीय महाविद्यालयात दाखल करण्यात आले. या घटनेची माहिती मिळाल्यानंतर राष्ट्रवादी कॉग्रेस शरद पवार गटाचे जिल्हाध्यक्ष अँड.रवींद्र पाटील यांनी त्यांच्या कार्यकर्त्यांसह रुग्णालयात धाव घेऊन जखमींची विचारपूस केली.
दरम्यान, पोलिसांना माहिती मिळताच त्यांनी घटनास्थळी धाव घेतली होती. या घटनेबाबत पोलीस ठाण्यात कोणतीही नोंद करण्यात आलेली नाही.
