छत्तीसगडच्या दुर्गमधून एक मोठी बातमी समोर आली आहे. कर्मचाऱ्यांनी भरलेली बस खड्ड्यात पडली. या भीषण अपघातात 6 जणांचा मृत्यू झाला. अनेक जण गंभीर जखमी आहेत. वरिष्ठ पोलीस अधिकारी घटनास्थळी उपस्थित असून बचावकार्य सुरू आहे.
मिळालेल्या माहितीनुसार, ही घटना कुम्हारी पोलीस ठाण्याच्या हद्दीत घडली. महामाया मंदिराजवळील केडिया डिस्टिलरी येथून कर्मचाऱ्यांना घेऊन एक बस निघाली होती. यावेळी कुम्हारीजवळ बसचे नियंत्रण सुटून खड्ड्यात पडली. मात्र, किती जखमी आहेत हे अद्याप स्पष्ट झालेले नाही. पोलीस आणि बचाव पथक घटनास्थळी आहे.बसमध्ये प्रवास करणाऱ्या लोकांना खड्ड्यातून बाहेर काढण्याचे काम सुरू आहे.
अंधारामुळे वाहन असंतुलित होऊन खड्ड्यात पडल्याचे सांगण्यात येत आहे. खड्ड्यात पडल्यानंतर बस उलटली आणि त्यात बसलेले लोक बसखाली गाडले गेले. बसमध्ये 30 ते 40 जण असल्याची माहिती समोर आली आहे. जखमींना कुम्हारी आरोग्य केंद्र, दुर्ग जिल्हा रुग्णालय आणि रायपूर येथे पाठवण्यात आले आहे.
