अकोला: छगन भुजबळ सध्या अजित पवार यांच्या नेतृत्त्वातील राष्ट्रवादी काँग्रेस पक्षाचे प्रमुख नेते आहेत. ओबीसी आरक्षणाच्या मुद्यावरुन छगन भुजबळ यांनी घेतलेल्या भूमिकांबाबत राष्ट्रवादीच्या नेत्यांमध्ये एकमत दिसत नाही. राज्यसभा खासदार प्रफुल पटेल यांनी काही दिवसांपूर्वी एक वक्तव्य करत भुजबळांची भूमिका पक्षाची भूमिका नसल्याचं म्हटलं होतं.
प्रकाश शेंडगे यांनी ओबीसींच्या राजकीय पक्षाच्या स्थापनेची घोषणा केली आहे. या पक्षाचं नेतृत्त्व छगन भुजबळ करण्यास तयार होतील का देखील महत्त्वाचा प्रश्न आहे. अश्यातच वंचित बहुजन आघाडीचे संस्थापक ॲड. प्रकाश आंबेडकर यांनी राज्याचे अन्न व नागरी पुरवठा मंत्री आणि राष्ट्रवादी काँग्रेसचे नेते छगन भुजबळ यांना महत्त्वाचं आवाहन केलं आहे. ओबीसी नेते राजकीय पक्ष काढणार आहेत. त्याचं नेतृत्त्व छगन भुजबळ यांनी करावं, असं आवाहन प्रकाश आंबेडकर यांनी केलं आहे.
या निर्णयाच्या अगोदर त्यांनी छगन भुजबळ यांचा सल्ला घेतला. ओबीसी पक्ष काढता आहेत ही फार चांगली गोष्ट आहे, असं प्रकाश आंबेडकर यांनी म्हटलं. छगन भुजबळ यांना आमचा सल्ला आहे की, आपण या ओबीसी संघटनेचे नेतृत्व करावे. पक्ष म्हणून वंचित बहुजन आघाडी आम्ही सामाजिक राजकीय त्यांना पूर्ण मदत करायला तयार आहोत, असंही ते म्हणाले.
