भाजपचे ज्येष्ठ नेते आणि माजी उपपंतप्रधान लालकृष्ण अडवाणी यांना रविवारी (३१ मार्च) भारतरत्न पुरस्काराने सन्मानित करण्यात आले. राष्ट्रपती द्रौपदी मुर्मू यांनी अडवाणी यांच्या निवासस्थानी जाऊन त्यांना भारतरत्न पुरस्काराने सन्मानित केले. यावेळी सरकारकडून पंतप्रधान नरेंद्र मोदींसह 10 लोक उपस्थित होते. या खास प्रसंगी अडवाणींच्या कुटुंबातील 10 लोकही उपस्थित होते. कालच चार व्यक्तिमत्त्वांना देशाचा सर्वोच्च सन्मान प्रदान करण्यात आला.
भाजपच्या ज्येष्ठ नेत्याच्या सत्कारप्रसंगी गृहमंत्री अमित शहा आणि भाजप अध्यक्ष जेपी नड्डा हेही अडवाणींच्या घरी उपस्थित होते. घरी सत्कार समारंभ आयोजित करण्यामागे अडवाणींची तब्येत आणि वृद्धापकाळ हाच हेतू असल्याचे मानले जाते. पंतप्रधान मोदींशिवाय, गृहमंत्री अमित शहा आणि जेपी नड्डा, उपराष्ट्रपती जगदीप धनखर, संरक्षण मंत्री राजनाथ सिंह, भाजप संघटन मंत्री बीएल संतोष, माजी उपराष्ट्रपती एम. व्यंकय्या नायडू यांनीही कार्यक्रमाला हजेरी लावली.
