काँग्रेस पक्षाचे ज्येष्ठ नेते संजय निरुपम यांची अनुशासनहीनता आणि पक्षविरोधी वक्तव्यामुळे सहा वर्षांसाठी पक्षातून हकालपट्टी करण्यात आली आहे. काँग्रेसचे अध्यक्ष केसी वेणुगोपाल यांनी हकालपट्टीला मंजुरी दिली आणि ती लगेच लागू झाली. या निर्णयानंतर संजय निरुपम सातत्याने काँग्रेसवर हल्लाबोल करत आहेत. दरम्यान, त्यांचे आणखी एक मोठे वक्तव्य समोर आले आहे.संजय निरुपम यांनी काँग्रेस सोडल्यानंतर ‘एक्स’वर पोस्ट टाकली आहे. त्यांनी लिहिले, “काँग्रेसपासून स्वातंत्र्य मिळाल्यानंतर आज माझे मन खूप हलके होत आहे. छातीवरून ओझे उतरल्यासारखे वाटते. संपूर्ण काँग्रेस परिवाराचे आभार.”
यापूर्वी काँग्रेसच्या स्टार प्रचारकांच्या यादीत संजय निरुपम यांचेही नाव होते. लोकसभा सार्वत्रिक निवडणुका 2024 च्या स्टार प्रचारकांच्या यादीतूनही निरुपम यांना हटवण्यात आले आहे. शिवसेनेसोबत जागावाटपाच्या चर्चेदरम्यान निरुपम यांनी पक्ष नेतृत्वाविरोधात केलेल्या वक्तव्यानंतर ही कारवाई करण्यात आली आहे. मुंबईतील लोकसभेच्या सहापैकी चार जागांसाठी शिवसेनेचे उमेदवार जाहीर झाल्यानंतर निरुपम यांनी प्रदेश काँग्रेस नेतृत्वावर जोरदार निशाणा साधला होता.
शिस्तभंगाच्या कारवाईनंतर निरुपम यांनी काँग्रेस पक्षात राहायचे की नाही याचा निर्णय घेणार असल्याचे सांगितले होते. त्यानंतर काही वेळातच त्यांनी पक्ष सोडण्याची घोषणाही केली. संजय निरुपम यांच्या या निर्णयामुळे महाराष्ट्राच्या राजकारणात चर्चेचा बाजार तापला आहे. आता संजय निरुपम पुढे काय पावले उचलतात हे पाहायचे आहे.
