जळगाव : खोटी देयके सादर करून 26 कोटींची करचोरी करणार्‍या संशयिताला अटक करण्यात आली आहे. याबाबत वस्तू व सेवा कर विभागाच्या जळगाव विभागाचे राज्यकर सह आयुक्त सुभाष भवर यांनी माहिती दिली.
बनावट बिलांच्या विक्रीमध्ये सहभागी असलेल्या करदात्यांविरुद्ध महाराष्ट्र वस्तू व सेवा कर विभागाने सुरू केलेल्या विशेष मोहिमेचा एक भाग म्हणून जळगाव येथील मे.अग्रवाल असोसिएटसची चौकशी करण्यात आली.
यामध्ये मे.अग्रवाल असोसिएटसचे मालक नैनेश संतोष अग्रवाल यांनी प्रत्यक्षात कुठल्याही मालाची विक्री न करता खोटी बिले देऊन बनावट कर वजावटीचा पुरवठा केल्याने त्यांना अटक करण्यात आली. नैनेश अग्रवाल यांना न्यायालयात हजर केल्यानंतर 14 दिवसांची कोठडी सुनावण्यात आली.
महाराष्ट्र वस्तू आणि सेवा कर विभागाने पुन्हा एकदा करचोरी करणार्‍यांना आणि बनावट पावत्या जारी करणार्‍या आणि बनावट इनपुट टॅक्स क्रेडिटचा दावा आणि पासिंग करणार्‍या व्यक्तींना कठोर इशारा दिला आहे.
नाशिक परीक्षेत्राचे अपर राज्यकर आयुक्त सुभाष एंगडे, जळगाव विभागाचे राज्यकर सहआयुक्त सुभाष परशुराम भवर यांच्या मार्गदर्शनाखाली तसेच अन्वेषण शाखेचे राज्य कर उपायुक्त महेंद्र शिंदे, सहायक राज्यकर आयुक्त माहूल संजयकुमार इंदानी यांच्या नेतृत्वाखाली रविंद्र पोटे सहायक राज्यकर आयुक्त, राज्यकर निरीक्षक व कर सहाय्यक यांनी ही कारवाई केली.
