Amalner crime: अमळनेरला आमली पदार्थांचा विळखा ! ५६ किलो गांजा जप्त

Amalner crime : अमळनेर पोलिसांनी जळोद रस्त्यावर मोठी कारवाई केली आहे. यात पोलिसांनी ५६ किलो गांजासह एकूण १९.३९ लाख रुपयांचा मुद्देमाल जप्त केला आहे. याप्रकरणी अमळनेर पोलिसात गुन्हा दाखल करण्यात आला आहे.

अमळनेर पोलिसांना, एका पांढऱ्या बोलेरो पिकअप मधून गांजा विक्रीसाठी येणार असल्याची गुप्त माहिती मिळाली होती.
शुक्रवार (दि.28) रोजी रात्री १०:५० वाजता पोलिसांनी जळोद रस्त्यावर उड्डाण पुलाजवळ एका संशयित वाहनास थांबिवले. या वाहनाच्या तपासणीत पोलीसांना एकूण १८ पॅकेटमध्ये भरलेला ५६ किलो ९७० ग्रॅम वजनाचा गांजा सापडला. ज्याची किंमत ११.३९ लाख रुपये आहे. तसेच, ८ लाख रुपये किमतीची बोलेरो वाहनही जप्त करण्यात आले आहे.

पोलिस निरीक्षक दत्तात्रय निकम यांच्या मार्गदर्शनाखाली आणि डीवायएसपी विनायक कोते यांच्या परवानगीने तहसीलदार रुपेशकुमार सुराणा यांच्या उपस्थितीत हा छापा टाकण्यात आला.याप्रकरणी मनोज सोनू पावरा (२४, महादेव सोनपाडा, ता. शिरपूर) आणि सीताराम वेळू सोनवणे (५२, वलवाडी, जि. बडवाणी, मध्यप्रदेश) यांना अटक करण्यात आली आहे. अमळनेर पोलीस पुढील तपास करीत आहेत.