---Advertisement---
धुळे : जिल्ह्यात संततधार मुसळधार पाऊस सुरु आहे. या सततच्या पावसाने साक्री तालुक्यातील पांझरा नदी दुथडी भरुन वाहू लागली आहे. यामुळे नदी पात्रात मोठ्या प्रमाणात पाणी पातळीत वाढ झाली आहे. अक्कलपाड़ा प्रकल्पात पाण्याची वाढती आवक लक्षात घेता प्रकल्पाचे सात दरवाजे अर्थ मीटरने उघडण्यात आले आहेत. सध्या अक्कलपाडा प्रकल्पातून 5230 क्यूसेक वेगाने पाण्याचा विसर्ग सुरू आहे.
सोमवार (७ जुलै ) रोजी पहाटे ४ वाजल्यापासून टप्प्याटप्याने हा विसर्ग वाढवण्यात आला आहे. पाण्याची आवक पुढेही वाढल्यास, पूर्वसूचनेनुसार विसर्गाचे प्रमाण वाढविण्यात येणार आहे. पांझारा नदीच्या पाणलोट क्षेत्रात मुसळधार पाऊस पडत आहे. तसेच अक्कलपाड़ा प्रकल्पाच्या वरच्या बाजूस असणाऱ्या पांइम्रा, मालनगाव व आमोडी प्रकल्पांतून पाण्याचा विसर्ग सुरू असल्याने अकरा मोठ्या प्रमाणात पाण्याची भर पडत आहे.
ही बाब लक्षात घेऊन पाटबंधारे विभाग आणि प्रशासनाने पांझरा नदीच्या दोन्ही काठावरील गावांतील नागरिक तसेच धुळे शहरवासीयांना सतर्क राहण्याचे आवाहन करण्यात आले आहे. “पांझरा नदीकाठच्या नागरिकांनी आवश्यक खबरदारी घ्यावी,” असे आवाहन अक्कलपाडा प्रकल्प उपविभागाचे उपविभागीय अधिकारी आणि धुळे मध्यम प्रकल्प विभागाचे कार्यकारी अभियंता यांनी केले आहे.
