जळगाव : जळगाव-भुसावळ दरम्यान, एका धावत्या रेल्वेतून पडून परप्रांतीय तरुणाचा मृत्यू झाल्याची घटना बुधवार , २० रोजी घडली. याप्रकरणी नशिराबाद पोलीस स्टेशनला आकस्मित मृत्यूची नोंद करण्यात आली आहे . राहुल कृष्णकुमार पांडेय (वय २५, रा. जौनपूर, उत्तर प्रदेश) असे मयत तरुणाचे नाव आहे.
राहुल पांडेय हा रोजगारानिमित्त महाराष्ट्रात आला होता. तो रेल्वेने गावाकडे जात असल्याची माहिती मिळाली आहे. जळगाव ते भुसावळ डाऊन रेल्वे लाईनवर खंबा क्रमांक ४३४/००० जवळ त्याचा मृतदेह पडून असल्याबाबत रेल्वे प्रबंधकानी नशिराबाद पोलीस स्टेशनला खबर दिली.
यानंतर नशिराबाद पोलीस स्टेशनच्या कर्मचाऱ्यांनी घटनास्थळी भेट दिली. पंचनामा करून मृतदेह शासकीय वैद्यकीय महाविद्यालय व रुग्णालयात शवविच्छेदनासाठी दाखल करण्यात आला. त्याचा मृत्यू हा सकाळी ९ वाजेपूर्वी झालेला असल्याची माहिती पोलिसांनी दिली आहे. दरम्यान, नशिराबाद पोलीस स्टेशन येथे अकस्मात मृत्यूची नोंद करण्यात आली आहे.
