चाळीसगाव : शहरातील महात्मा फुले सामाजिक व शैक्षणिक विकास मंडळ संचलित जय हिंद माध्यमिक व उच्च माध्यमिक विद्यालयाच्या सचिव व मुख्याध्यापकासह क्लार्कने शिक्षक व शिक्षकेतर कर्मचारी व शासनाची फसवणूक केल्याचा प्रकार समोर आला आहे.
एकूण १५ शिक्षक व शिक्षकेतर कर्मचाऱ्यांची फसवणूक करून ९७ लाख रुपये लाटण्यात आल्याने चाळीसगाव पोलीस स्थानकात सचिव व मुख्याध्यापकासह क्लार्कविरुद्ध गुन्हा दाखल करण्यात आला.
दरम्यान, संस्थेचे सचिव अशोक खलाणे यांना अटक करण्यात आली शनिवारी न्यायालयात हजर केल्यानंतर २१ पर्यंत पोलीस कोठडी सुनावण्यात आली तर मुख्याध्यापकासह क्लार्क पसार झाल्याने त्यांचा कसून शोध सुरू आहे.
असे आहे फसवणूक प्रकरण
चाळीसगाव तालुका पंचायत समितीतील तालुका विस्तार अधिकारी विलास आनंदा भोई (वय ५० रा. उंटवाडी तिळकेनगर, नाशिक) यांनी दिलेल्या फिर्यादीनुसार, विलास भोई हे जिल्हा परिषद प्राथमिक शाळेचे कामकाज पाहतात. चाळीसगाव शहरात महात्मा, फुले सामाजिक व शैक्षणिक विकास मंडळ संचलित जय हिंद माध्यमिक व उच्च माध्यमिक विद्यालय ही शाळा मालेगाव रोडलगत आहे. ही शिक्षण संस्था खाजगी अनुदानित असून सध्या या संस्थेचे सचिव अशोक हरी खलाणे (रा. नेताजी चौक, चाळीसगाव) हे असून मुख्याध्यापक अभिजीत जगन्नाथ खलाणे (रा. धुळे रोड जयहिंद हायस्कूलजवळ चाळीसगाव) व क्लर्क ज्ञानेश्वर दगा महाजन (रा. तेजस कोणार्क, धुळे रोड, चाळीसगाव) हे आहेत.
शिक्षण संस्थेतील सर्व कामकाज हेच पाहतात. दरम्यान जय हिंद माध्यमिक व उच्च माध्यमिक विद्यालयातील शिक्षक व शिक्षकेतर कर्मचारी यांचे शासनाकडून येणान्या पगाराच्या अनुदानातून सचिव, मुख्याध्यापक व क्लर्क यांनी काही शिक्षकांना नोकरीवरून काढून टाकण्याची धमकी दिली. एवढेच नाही तर बळजबरीने संमती पत्रावर सह्या घेतल्या आहेत व काही शिक्षकांची कोणत्याही प्रकारे संमती न घेता बेकायदेशीररीत्या व शासनाचा कोणताही नियम व आदेश नसताना २००६ पासून ते डिसेंबर २०२४ पर्यंत शिक्षक शिक्षकेतर कर्मचारी यांच्या पगारातून स्वतःच्या फायद्यासाठी रक्कम कपात केली आहे. एकूण १५ शिक्षक व शिक्षकेतर कर्मचाऱ्यांच्या पगाराच्या अनुदानातून ९७लाख एक हजार १०० रुपये इतकी रक्कम कपात करण्यात आली.
अशोक खलाणेंना अटक
संशयित अशोक हरी खलाणे यांना अटक करण्यात आल्यानंतर शनिवारी न्यायालयात हजर केले असता न्यायालयाने २१ पर्यंत त्यांना पोलीस कोठडी सुनावली. सरकारतर्फे साहाय्यक सरकारी अभियोक्ता रमेश माने, शशिकांत माने, मनोज माने यांनी युक्तिवाद केला. तपास पोलीस निरीक्षक किरणकुमार कबाडी यांच्या मार्गदर्शनाखाली सुरू आहे.
