---Advertisement---
कर्मचारी भविष्य निर्वाह निधी संघटनेच्या (EPFO) सदस्यांसाठी एक आनंदाची बातमी आहे. EPFO ने आगाऊ दाव्यांसाठी ऑटो-सेटलमेंट मर्यादा १ लाख रुपयांवरून ५ लाख रुपये केली आहे. यामुळे EPFO सदस्यांना निधी जलद उपलब्ध होईल, अशी माहिती केंद्रीय कामगार आणि रोजगार मंत्री मनसुख मांडविया यांनी मंगळवारी दिली. ते म्हणाले की, या सेवा वाढीचा लाखो सदस्यांना लाभ मिळण्याची अपेक्षा आहे. सदस्यांना लवकारात – लावकार आर्थिक मदत देण्यासाठी EPFO ने कोविड-१९ महामारी दरम्यान प्रथमच आगाऊ दाव्यांचे ऑटो-सेटलमेंट सुरू केले होते.
दाखल केलेला दावा तीन दिवसांत निघणार निकाली
केंद्रीय मंत्र्यांच्या मते, २०२३-२४ या आर्थिक वर्षात ८९.५२ लाखांच्या तुलनेत २०२४-२५ या आर्थिक वर्षात एकूण २.३२ कोटी ऑटो दावे निकाली काढले गेले. मंत्र्यांनी सांगितले की सदस्याने दाखल केलेला आगाऊ दावा दाखल केल्यापासून तीन दिवसांत निकाली काढला जाईल.
एजंट्सची मदत घेण्याची गरज नाही
कर्मचारी भविष्य निर्वाह निधी संघटनेने आपल्या सदस्यांना तृतीय पक्ष एजंट्सची मदत घेण्याविरुद्ध इशारा दिला आहे. तसेच त्यांनी त्यांच्या पीएफ खात्यांशी संबंधित सेवांसाठी ऑनलाइन प्लॅटफॉर्म वापरण्याचा सल्ला दिला आहे, जेणेकरून महत्त्वाची माहिती सार्वजनिक होण्याचा धोका टाळता येईल. ईपीएफओचे सात कोटींहून अधिक सदस्य आहेत जे विविध खाजगी आणि सार्वजनिक क्षेत्रातील उद्योगांचे कर्मचारी किंवा माजी कर्मचारी आहेत. सरकारच्या म्हणण्यानुसार, असे आढळून आले की अनेक सायबर कॅफे ऑपरेटर / फिनटेक कंपन्या अधिकृतपणे मोफत असलेल्या सेवांसाठी ईपीएफओ सदस्यांकडून मोठ्या प्रमाणात शुल्क आकारत आहेत. अनेक प्रकरणांमध्ये हे ऑपरेटर फक्त ईपीएफओच्या ऑनलाइन तक्रार प्लॅटफॉर्मचा वापर करतात, जो कोणताही सदस्य स्वतःहून मोफत वापरू शकतो. बाह्य संस्था ईपीएफओद्वारे अधिकृत नाहीत.
एप्रिल २०२५ मध्ये १९.१४ लाख सदस्य जोडले गेले
कामगार मंत्रालयाने गेल्या रविवारी जाहीर केलेल्या वेतन आकडेवारीनुसार, एप्रिल २०२५ मध्ये ईपीएफओने निव्वळ आधारावर १९.१४ लाख सदस्य जोडले. ही आकडेवारी मार्च २०२५ च्या तुलनेत ३१.३१ टक्के आणि एप्रिल २०२४ च्या तुलनेत १.१७ टक्क्यांनी वाढ दर्शवते. कर्मचारी भविष्य निर्वाह निधी संघटनेने (ईपीएफओ) एप्रिल २०२५ मध्ये सुमारे ८.४९ लाख नवीन सदस्यांची नोंदणी केली, जी मार्च २०२५ च्या तुलनेत १२.४९ टक्के वाढ दर्शवते.
