उपराष्ट्रपती पदाचे एनडीएचे उमेदवार सीपी राधाकृष्णन यांनी दिल्लीत पंतप्रधान मोदींची भेट घेतली

महाराष्ट्राचे राज्यपाल आणि उपराष्ट्रपतीपदाचे एनडीएचे उमेदवार सीपी राधाकृष्णन यांनी दिल्लीत पंतप्रधान नरेंद्र मोदी यांची भेट घेतली. दोन्ही नेत्यांच्या भेटीचे फोटो समोर आले आहेत. रविवारी, केंद्रातील सत्ताधारी आघाडी एनडीएने महाराष्ट्राचे राज्यपाल सीपी राधाकृष्णन यांना आगामी उपराष्ट्रपती निवडणुकीसाठी आपले उमेदवार म्हणून घोषित केले आहे. २१ जुलै रोजी जगदीप धनखड यांनी प्रकृतीच्या कारणास्तव उपराष्ट्रपती पदाचा राजीनामा दिला होता.

पंतप्रधान मोदींच ट्विट

या भेटीबाबत, पंतप्रधान मोदींनी त्यांच्या अधिकृत एक्स हँडलवर ट्विट केले आणि म्हटले- “सीपी राधाकृष्णनजी यांची भेट घेतली. एनडीएचे उपराष्ट्रपतीपदाचे उमेदवार झाल्याबद्दल त्यांचे अभिनंदन केले . त्यांची दीर्घ सार्वजनिक सेवा आणि विविध क्षेत्रातील अनुभव आपल्या देशाला समृद्ध करेल. देवाच्या कृपेने त्यांनी नेहमीच दाखवलेल्या समर्पणाने आणि दृढनिश्चयाने देशाची सेवा करत राहावी.”

Met Thiru CP Radhakrishnan Ji. Conveyed my best wishes on his being the NDA’s Vice Presidential nominee. His long years of public service and experience across domains will greatly enrich our nation. May he continue to serve the nation with the same dedication and resolve he has… pic.twitter.com/5vjFzzwUqn

— Narendra Modi (@narendramodi) August 18, 2025

कोण आहेत सीपी राधाकृष्णन

उपराष्ट्रपतीपदाचे एनडीए उमेदवार सीपी राधाकृष्णन हे मूळचे तामिळनाडूचे आहेत आणि सध्या ते महाराष्ट्राचे राज्यपाल आहेत. ते बराच काळ भाजप, आरएसएस आणि जनसंघाशी संबंधित आहेत. यापूर्वी त्यांनी झारखंड आणि तेलंगणाच्या राज्यपालपदाचा अतिरिक्त कार्यभारही सांभाळला आहे. ते पुद्दुचेरीचे उपराज्यपालही राहिले आहेत. मिळालेल्या माहितीनुसार, सीपी राधाकृष्णन वयाच्या १६ व्या वर्षी राष्ट्रीय स्वयंसेवक संघ (आरएसएस) आणि जनसंघात सामील झाले. दक्षिण भारतात, विशेषतः तामिळनाडू आणि केरळमध्ये भाजपला बळकटी देण्यात त्यांनी महत्त्वाची भूमिका बजावली आहे. ते कोइम्बतूर (तामिळनाडू) येथून लोकसभा खासदार राहिले आहेत.

उपराष्ट्रपती पदाच्या निवडणुकीच वेळापत्रक

• निवडणूक आयोगाने जारी केलेली अधिसूचना- ०७ ऑगस्ट २०२५ (गुरुवार)
• नामांकन अर्ज भरण्याची अंतिम तारीख- २१ ऑगस्ट २०२५ (गुरुवार)
• नामांकन अर्जांची छाननी करण्याची तारीख- २२ ऑगस्ट २०२५ (शुक्रवार)
• उमेदवारी मागे घेण्याची अंतिम तारीख- २५ ऑगस्ट २०२५ (सोमवार)
• आवश्यक असल्यास मतदान कोणत्या दिवशी होईल – ०९ सप्टेंबर २०२५ (मंगळवार)
• मतदानाची वेळ- सकाळी १०.०० ते सायंकाळी ५.००
• आवश्यक असल्यास मतमोजणी कोणत्या दिवशी होईल – ०९ सप्टेंबर २०२५ (मंगळवार)

बैठकांच्या फेऱ्या सुरू

माहितीनुसार, उपराष्ट्रपती पदाच्या निवडणुकीसंदर्भात एनडीएच्या नेत्यांची बैठक सोमवारी संध्याकाळी ६ वाजता केंद्रीय मंत्री प्रल्हाद जोशी यांच्या निवासस्थानी होणार आहे. याशिवाय, उद्या मंगळवारी दुपारी १ वाजता मंत्रिमंडळाची बैठकही होणार आहे.