---Advertisement---
भुसावळ : म्हशी चारण्यासाठी गेलेल्या तरुण वाघूर नदीच्या प्रवाहात वाहून गेला होता. ही घटना शुक्रवारी (१९ सप्टेंबर )रोजी सकाळी ९ वाजता साकेगाव येथे घडली होती. ही घटना घडल्यापासून साकेगावातील तरुणांनी नदीत त्याचा शोध घेतला असता तो सापडला नव्हता. शनिवारी (२० सप्टेंबर) गावापासून चार किलोमीटर दूर वाघूर नदीत मासेमारी करणाऱ्या व्यावसायिकांना नदीच्या पात्रात सकाळी ७ वाजता मृतदेह आढळला. लक्ष्मण वसंत ठाकरे (वय २५, रा. साकेगाव) असे मयत तरुणाचे नाव आहे.
शुक्रवारी लक्ष्मण ठाकरे म्हशी चारण्यासाठी वाघूर नदीवरील जुन्या पुलावरून नदीच्या पलीकडे गेला होता. पाण्याचा प्रवाहाचा अंदाज न झाल्यामुळे लक्ष्मण ठाकरे हा वाहून गेला होता.
तब्बल सात ते आठ तासापर्यंत शोधकार्य करूनही तो सापडला नाही. अखेर दुसऱ्या दिवशी शनिवार दि. २० रोजी सकाळी ७ वाजता जोगलखेडा येथे मासे व्यवसायिक हे नदीपात्रात मासे पकडण्यासाठी गेले असता त्यांना लक्ष्मणचा मृतदेह नदीपात्राजवळ आढळला. त्याच्या पश्चात २ भाऊ, १ बहीण असा परिवार आहे. कुटुंबाचा तो कर्ताधर्ता असल्याने लक्ष्मणच्या मृत्यूमुळे परिवारावर मोठा आघात कोसळला आहे.
घटना घडल्यानंतर महसूल प्रशासनाच्या माध्यमातून एनडीआरएफच्या टीमला माहिती कळविण्यात आली होती, मात्र टीम पाचोरा येथे गेली होती असे सांगण्यात आले. विषेश म्हणजे साकेगाव तलाठी कार्यालय येथे सद्यस्थितीत दोन तलाठी कार्यान्वित आहे. परंतु, घटनास्थळी एकही तलाठी पोहोचला नाही म्हणून ग्रामस्थांकडून घटनास्थळी संताप व्यक्त करण्यात आला.
जामनेरातून ६० हजार रुपये किंमतीची मोटारसायकल लांबविली
जामनेर शहरातील आनंद नगर भागातून ६० हजार रुपये किंमतीची मोटारसायकल चोरीस गेल्याची घटना घडली आहे. या प्रकरणी अज्ञात चोरट्याविरुद्ध गुन्हा दाखल करण्यात आला असल्याची माहिती दि. २१ सप्टेंबर रोजी जामनेर पोलीस स्टेशनतर्फे देण्यात आली.
याबाबत माहिती अशी की, जामनेर शहरातील आनंद नगर भागात गणेश चोरमले हे राहतात. दि. २० सप्टेंबर रोजी रात्री कोणीतरी अज्ञात चोरट्याने त्यांच्या घरासमोरुन ६० हजार रुपये किंमतीची मोटारसायकल क्रमांक एम एच. २० जी.एस. २५१४ चोरुन नेली. मोटार सायकलचा इतरत्र शोध घेतला असता ती मिळून न आल्याने गणेश चोरमले यांनी जामनेर पोलीस स्टेशन गाठत फिर्याद दिल्याने अज्ञात चोरट्याविरुद्ध गुन्हा दाखल करण्यात आला आहे. पुढील तपास पोलीस नाईक रविद्र देशमुख करीत आहे.
