---Advertisement---
पाचोरा : सिंधी समाजाचे आराध्य दैवत भगवान झूलेलाल (वरुणावतार) यांच्याविषयी जोहर पार्टीचे अध्यक्ष अमित बघेल यांनी केलेल्या आक्षेपार्ह वक्तव्यामुळे सिंधी समाजात तीव्र संतापाचे वातावरण निर्माण झाले आहे. धार्मिक भावना दुखावल्याचा आरोप करत, येथील सिंधी समाज, पूज्य सिंधी जनरल पंचायत तसेच भारतीय सिंधी सभा – युवा शाखा (महाराष्ट्र प्रदेश) यांच्या वतीने येथील उपविभागीय अधिकारी यांच्याकडे लेखी निवेदन देण्यात आले.
छत्तीसगड राज्यातील रायपूर येथे २६ ऑक्टोबर २०२५ रोजी आयोजित पंचशताब्दी संवाद कार्यक्रमात अमित बघेल यांनी भगवान झूलेलालांविषयी आक्षेपार्ह आणि सांप्रदायिक वक्तव्य केल्याचा आरोप निवेदनात करण्यात आला आहे. हे वक्तव्य सामाजिक माध्यमांवर मोठ्या प्रमाणात व्हायरल झाले असून, देशभरातील सिंधी समाजात तीव्र रोष व्यक्त करण्यात येत आहे. समाजाच्या श्रद्धा, परंपरा आणि धार्मिक आस्थेचा अपमान करणारे असे वक्तव्य अमान्य असल्याचे निवेदनात नमूद केले आहे.
सिंधी समाजाच्या प्रतिनिधींनी उपविभागीय अधिकारी यांना दिलेल्या निवेदनात म्हटले आहे की, अमित बघेल यांनी जाणूनबुजून धार्मिक भावना दुखावून समाजात सांप्रदायिक तेढ निर्माण करण्याचा प्रयत्न केला आहे. त्यामुळे प्रशासनाने या घटनेची गंभीर दखल घेऊन तातडीने चौकशी सुरू करावी आणि संबंधितांवर कठोर कारवाई करावी, अशी मागणी करण्यात आली आहे.
या संदर्भातील निवेदनाची प्रत राज्याचे मुख्यमंत्री देवेंद्र फडणवीस , छत्तीसगड मुख्यमंत्री विष्णु देव साई, तसेच गृहमंत्री अमित शाह यांना पाठविण्यात आली असून सिंधी समाजाच्या भावनांचा अपमान करणाऱ्या वक्तव्यावर कठोर कारवाई करून धार्मिक सलोखा अबाधित ठेवावा, अशी मागणी निवेदनाद्वारे करण्यात आली आहे.
निवेदन सादर करताना समाजातील अनेक मान्यवर उपस्थित होते, त्यामध्ये अर्जुनदास टाकुरोजा, गोवर्धनदास रिझाणी, गुलाब मिझुमल पंजावणी, लक्ष्मणदास ताराचंद पुर्सनाणी, मोटूमल टकणमल नागवाणी, गुलाबचंद गोकुलदास केसवाणी, राम केसवाणी,रवी केसवानी आदी उपस्थित होते.
