---Advertisement---
कित्येक वर्षांपासून रखडलेल्या राज्यातील महानगरपालिका निवडणुका अखेर 15 जानेवारी रोजी पार पडल्या. या टप्प्यात महाराष्ट्रातील सुमारे 29 महानगरपालिकांसाठी मतदान झाले. मुंबई महानगरपालिकेच्या निवडणुकीत शिवसेना आणि भाजप यांनी महायुती म्हणून एकत्र येत निवडणूक लढवली होती. निकालानंतर भाजप हा सर्वाधिक जागा जिंकणारा पक्ष ठरला, मात्र महापौर पदावर कोणाचा दावा असणार यावरून राजकीय चर्चांना वेग आला.
यावर उपमुख्यमंत्री एकनाथ शिंदे यांनी महत्त्वपूर्ण आणि स्पष्ट भूमिका मांडली आहे. मुंबईत महायुतीचाच महापौर निवडला जाईल, असे त्यांनी ठामपणे सांगितले. ठाणे, कल्याण-डोंबिवली, उल्हासनगर यांसारख्या ठिकाणी जिथे शिवसेना-भाजप महायुतीने संयुक्तपणे निवडणूक लढवली आहे, तिथेही महायुतीचाच महापौर असेल, असे शिंदे यांनी स्पष्ट केले.
मुंबई महानगरपालिकेत कोणत्याही एका पक्षाला स्पष्ट बहुमत मिळाले नसल्याने विविध शक्यता व्यक्त केल्या जात होत्या. शिवसेनेच्या नगरसेवकांना पंचतारांकित हॉटेलमध्ये ठेवण्यात आल्यामुळे राजकीय हालचालींबाबत चर्चा रंगल्या होत्या. मात्र या सर्व तर्क-वितर्कांना छेद देत, मुंबईत महायुतीचाच महापौर होईल, असे शिंदे यांनी ठामपणे सांगितले.
मुंबईकरांनी महायुतीवर विश्वास ठेवून शिवसेना आणि भाजपला मतदान केले आहे. त्या विश्वासाला तडा जाईल असा कोणताही निर्णय घेतला जाणार नाही, असेही त्यांनी स्पष्ट केले. नागरिकांनी अफवांवर विश्वास ठेवू नये, असे आवाहनही त्यांनी केले.
याशिवाय, राज्यातील ज्या-ज्या महानगरपालिकांमध्ये शिवसेना आणि भाजप यांनी महायुती म्हणून निवडणूक लढवली आहे, तिथेही महापौर पद महायुतीकडेच राहील, असे शिंदे यांनी नमूद केले. त्यामुळे मुंबईसह राज्यात नवीन राजकीय समीकरणे तयार होत असल्याच्या चर्चांना त्यांनी पूर्णविराम दिला.
या निवडणुकीत भाजप पहिल्या क्रमांकाचा पक्ष ठरला असून शिवसेना ठाकरे गट दुसऱ्या, तर शिवसेना शिंदे गट तिसऱ्या क्रमांकावर आहे. त्यामुळे भाजपाचाच महापौर होणार, अशी चर्चा सुरू होती. मात्र आता एकनाथ शिंदे यांनी महायुतीचा महापौर निवडला जाईल, असे स्पष्ट केल्याने या मुद्द्यावरचे चित्र अधिक स्पष्ट झाले आहे.
