---Advertisement---
पहाटेच्या शांत वातावरणात अचानक झालेल्या मोठ्या स्फोटाने संपूर्ण परिसर दणाणून गेला आणि काही क्षणांतच एका निवासी इमारतीला भीषण आगीने वेढले. लोक झोपेत असतानाच आग इतक्या वेगाने पसरली की अनेकांना बाहेर पडण्याची संधीही मिळाली नाही. या दुर्दैवी घटनेत निष्पाप लोकांचे जीव गेले असून राजधानी दिल्लीत एकच खळबळ उडाली आहे.
दिल्लीतील शाहदरा परिसरातील विवेक विहार भागात रविवारी पहाटे ही भीषण आग लागली. प्राथमिक माहितीनुसार, बी-13 या निवासी इमारतीच्या दुसऱ्या मजल्यावर एसीचा स्फोट झाला आणि त्यानंतर काही क्षणांतच आगीने विक्राळ रूप धारण केले. स्फोट इतका जोरदार होता की त्याचा आवाज दूरवर ऐकू गेला आणि लगेचच संपूर्ण इमारतीत धूर आणि ज्वाळा पसरल्या. झोपेत असलेल्या रहिवाशांना काय घडते आहे हे समजण्याआधीच परिस्थिती हाताबाहेर गेली.
घटनेची माहिती मिळताच अग्निशमन नियंत्रण कक्षाला तातडीने कॉल करण्यात आला. त्यानंतर अग्निशमन दलाच्या तब्बल 14 गाड्या घटनास्थळी दाखल झाल्या आणि बचावकार्य सुरू करण्यात आले. आगीची तीव्रता इतकी जास्त होती की अग्निशमन दलालाही आगीवर नियंत्रण मिळवण्यासाठी मोठा संघर्ष करावा लागला. अखेर सुमारे अडीच तासांच्या अथक प्रयत्नांनंतर सकाळी 6 वाजून 25 मिनिटांनी आगीवर नियंत्रण मिळवण्यात यश आले. मात्र तोपर्यंत मोठे नुकसान झाले होते.
या भीषण आगीत आतापर्यंत 9 जणांचा मृत्यू झाल्याची अधिकृत माहिती समोर आली आहे. तसेच चार ते सहा जण गंभीररित्या भाजले असून त्यांच्यावर जवळच्या रुग्णालयात उपचार सुरू आहेत. काही जखमींची प्रकृती अत्यंत चिंताजनक असल्याने मृतांचा आकडा वाढण्याची भीती व्यक्त केली जात आहे. या घटनेने अनेक कुटुंबांवर दुःखाचा डोंगर कोसळला आहे. दरम्यान, अग्निशमन दल आणि पोलिसांनी संयुक्त कारवाई करत सुमारे 14 ते 20 लोकांना सुरक्षित बाहेर काढले. सुरुवातीला इमारतीत अजून काही लोक अडकल्याचा संशय व्यक्त केला जात होता, मात्र पोलिसांनी सध्या आत कोणीही अडकले नसल्याचे स्पष्ट केले आहे.
प्रत्यक्षदर्शींनी दिलेल्या माहितीनुसार, स्फोट इतका भीषण होता की काही क्षणांसाठी परिसरात भीती पसरली. लोक घराबाहेर धावत आले, मात्र आगीचा वेग पाहता परिस्थिती अधिकच गंभीर बनली. काही जणांनी जीव वाचवण्यासाठी इमारतीतून उड्या मारण्याचाही प्रयत्न केल्याचे सांगितले जात आहे.
