कोथरूड परिसरात आयटी अभियंत्याला झालेल्या मारहाणप्रकरणी गुंड गजा मारणे याला पोलिसांकडून सोमवारी (ता. २४) अटक करण्यात आली आहे . पोलिसांकडून गजा मारणेसह पाच जणांविरुद्ध महाराष्ट्र संघटित गुन्हेगारी नियंत्रण कायद्यान्वये (मकोका) कारवाई करण्यात आली आहे.
काय आहे प्रकरण?
१९ फेब्रुवारी रोजी, कोथरूडमधील एक आयटी अभियंता दुचाकीवरून घरी जात असताना, भेलकेनगर येथे रस्त्यावर मोठी गर्दी होती. गर्दीतून दुचाकी काढण्याच्या प्रयत्नात काही गुंडांनी त्याच्यावर बेदम मारहाण केली. या हल्ल्यात अभियंता गंभीर जखमी झाला. त्याने कोथरूड पोलिस ठाण्यात फिर्याद नोंदवली, त्यानंतर पोलिसांनी तपास सुरू केला.
गजा मारणे टोळीचा संबंध उघड
या हल्ल्याच्या तपासादरम्यान पोलिसांनी ओम तीर्थराम धर्मजिज्ञासू (वय ३५), किरण कोंडिबा पडवळ (वय ३१) आणि अमोल विनायक तापकीर (वय ३५, तिघेही रा. शास्त्रीनगर, कोथरूड) यांना अटक केली. तसेच, या प्रकरणातील आणखी एक आरोपी श्रीकांत संभाजी पवार फरार आहे. चौकशीत या सर्व आरोपींचा संबंध गजा मारणे टोळीशी असल्याचे उघड झाले.
गजा मारणे व त्याच्या टोळीवर ‘मकोका’ अंतर्गत कठोर कारवाई
गुन्ह्यातील मुख्य आरोपी गजा मारणे याला सोमवारी अटक करण्यात आली. तसेच त्याचा भाचा रूपेश मारणे याचाही या हल्ल्यात सहभाग असल्याचे निष्पन्न झाले आहे. त्याला पकडण्यासाठी शोधमोहीम सुरू आहे.
पोलिसांनी गजा मारणे व त्याच्या साथीदारांविरुद्ध ‘मकोका’ कायद्यानुसार गुन्हा दाखल केला आहे. आरोपींवर मकोका कायद्यांतर्गत गुन्हा दाखल झाल्याने त्यांना सहज जामीन मिळणार नाही, तसेच त्यांची संपत्तीही जप्त केली जाऊ शकते.
केंद्रीय राज्यमंत्र्यांचा पोलिसांवर सवाल
या घटनेनंतर केंद्रीय राज्यमंत्री मुरलीधर मोहोळ यांनी पुणे पोलिसांच्या कार्यपद्धतीवर सवाल उपस्थित केला.
“शहरात पुन्हा टोळ्यांचे वर्चस्व निर्माण होत आहे का? पोलिसांनी आत्मपरीक्षण करायला हवे. पोलिस डोळे झाकून बसले आहेत का?” असा संतप्त सवाल त्यांनी केला.
गुन्हेगारीला आळा घालण्यासाठी पोलिसांची धडक कारवाई
गजा मारणे टोळीची दहशत मोडीत काढण्यासाठी पोलिसांनी कठोर पावले उचलली आहेत. सोमवारी शास्त्रीनगर ते भेलकेनगर परिसरातून अटक करण्यात आलेल्या आरोपींची धिंड काढण्यात आली, जेणेकरून स्थानिक नागरिकांना या कारवाईबद्दल माहिती मिळेल आणि गुन्हेगारांमध्ये भीती निर्माण होईल.
