War Against Terror : ऑपरेशन सिंदूरच्या यशानंतर, पंतप्रधान मोदींनी लष्कराच्या जवानांची भेट घेतली आहे. पंतप्रधान मोदी आदमपूर एअरबेसवर पोहोचले आणि येथील सैनिकांची भेट घेतली. यापूर्वी, पंतप्रधान मोदींनी सोमवारी रात्री ८ वाजता देशाला संबोधित केले होते, ज्यामध्ये त्यांनी सैनिकांच्या शौर्याला आणि धाडसाला सलाम केला होता. पंतप्रधान नरेंद्र मोदी म्हणाले की, आपल्या सैन्याने आपले लक्ष्य साध्य केले आहे. आम्ही आमच्या सैन्याला दहशतवाद्यांचा खात्मा करण्यासाठी पूर्ण स्वातंत्र्य दिले आहे.
पाकिस्तानला कडक संदेश
ऑपरेशन सिंदूरच्या यशानंतर देशाला संबोधित करताना पंतप्रधान मोदींनी केलेले भाषण अगदी स्पष्ट होते. जर पाकिस्तानने दहशतवाद्यांना आश्रय देणे थांबवले नाही तर त्याला अधिक परिणाम भोगावे लागतील, असा स्पष्ट संदेश पंतप्रधान मोदींनी दिला. पंतप्रधान मोदी म्हणाले की, भारताचे मत अगदी स्पष्ट आहे, दहशतवाद आणि चर्चा एकत्र चालू शकत नाहीत, दहशतवाद आणि व्यापार एकत्र जाऊ शकत नाहीत आणि पाणी आणि रक्त देखील एकत्र वाहू शकत नाही. पंतप्रधान मोदी म्हणाले, ‘आमचे जाहीर धोरण आहे की जर पाकिस्तानशी कोणतीही चर्चा झाली तर ती फक्त दहशतवादावरच होईल. जर पाकिस्तानशी काही चर्चा झाली तर ती फक्त पाकव्याप्त काश्मीर, पीओके यावरच होईल.
भारताने सुरू केल ऑपरेशन सिंदूर
पहलगाम दहशतवादी हल्ल्यानंतर भारताने ०६-०७ मे च्या रात्री पाकिस्तान आणि पीओकेमधील दहशतवादी तळांवर हवाई हल्ले केले होते. भारताने पाकिस्तान आणि पीओकेमधील 9 दहशतवाद्यांच्या अड्ड्यांवर हल्ला केला. यामध्ये अनेक दहशतवादीही मारले गेले. भारताने या हल्ल्याचे वर्णन पहलगाममधील दहशतवादी हल्ल्यानंतर केलेली कारवाई म्हणून केले. यासोबतच, भारताने म्हटले आहे की या हल्ल्यात पाकिस्तानच्या कोणत्याही लष्करी तळाला लक्ष्य करण्यात आले नाही किंवा कोणत्याही नागरिकाचे नुकसान झाले नाही. त्याला ऑपरेशन सिंदूर असे नाव देण्यात आले.
