Cyber Attack : पहलगाम दहशतवादी हल्ल्यानंतर भारतातील महत्त्वाच्या पायाभूत सुविधांच्या वेबसाईटवर १५ लाखांहून अधिक सायबर हल्ले करण्यासाठी जबाबदार असलेल्या सात ॲडव्हान्स्ड पर्सिस्टंट थ्रेट गटांची ओळख महाराष्ट्र सायबरने पटवून दिली आहे. यापैकी केवळ १५० हल्ले यशस्वी झाले, असे अधिकाऱ्यांनी सोमवारी सांगितले.
भारत सरकारच्या वेबसाईट्सना शेजारील देश तसेच बांगलादेश आणि मध्य पूर्वेकडील प्रदेशातून सायबर हल्ल्यांचा सामना करावा लागत आहे. हॅकर्सनी मुंबईतील छत्रपती शिवाजी महाराज आंतरराष्ट्रीय विमानतळावरून डेटा चोरल्याचे, विमान वाहतूक आणि महानगरपालिका प्रणाली हॅक केल्याचे आणि निवडणूक आयोगाच्या वेबसाईटला लक्ष्य केल्याचे दावे पत्रकारांना संबोधित करताना महाराष्ट्र सायबरच्या एका वरिष्ठ अधिका-यांनी खोडून काढले.
भारतीय सशस्त्र दलांनी दहशतवादाविरुद्ध याच नावाने सुरू केलेल्या लष्करी कारवाईअंतर्गत तयार केलेल्या ‘रोड ऑफ सिंदूर’ या अहवालात, राज्याच्या नोडल सायबर एजन्सीने पाकिस्तानशी संबंधित हॅकिंग गटांनी सुरू केलेल्या सायबर युद्धाची सविस्तर माहिती दिली आहे.
हा अहवाल पोलिस महासंचालक आणि राज्य गुप्तचर विभागासह सर्व प्रमुख कायदा अंमलबजावणी संस्थांना सादर करण्यात आला आहे. अहवालानुसार, हे सायबर हल्ले बांगलादेश, पाकिस्तान, मध्य पूर्व आणि एका इंडोनेशियन गटातून झाले आहेत, असे महाराष्ट्र सायबरचे अतिरिक्त पोलिस महासंचालक यशस्वी यादव म्हणाले.
महाराष्ट्र सायबरने समाज माध्यमांवरील भारत-पाकिस्तान लष्करी संघर्षांशी संबंधित चुकीची माहिती आणि बनावट बातम्यांच्या पाच हजारांहून अधिक घटना ओळखल्या आणि काढून टाकल्या. ८० विशिष्ट चुकीची माहिती काढून टाकण्यासाठी ध्वजांकित केलेल्या प्रकरणांपैकी ३५ काढून टाकण्यात आल्या आहेत, तर उर्वरित ४५ प्रकरणांवर कारवाई प्रलंबित आहे.
